Во текот на ноќта турската полиција уапси околу 145 лица осомничени за поврзаност со забранетата Курдиската работничка партија, јавија денеска државните медиуми.

Апсењата доаѓаат два дена по бомбашкиот напад во Анкара за кој одговорноста ја презеде милитантната група Курдската работничка партија (ПКК).

Двајца напаѓачи во неделата извршија бомбашки напад пред зградата на Министерството за внатрешни работи во Анкара, при што двајца полицајци беа полесно повредени.

Едниот напаѓач се разнел, а другиот бил убиен од полицијата, соопштија претходно локалните власти.

Турција потоа изврши воздушни напади врз цели на милитантите во северен Ирак и ги приведе осомничените во Истанбул во текот на ноќта, неколку часа откако ПКК ја презеде одговорноста за нападот.

Најновите полициски операции биле фокусирани на југоисточната турска провинција Чанлиурфа.

„Против 'разузнавачките единици' на курдската милитантна група ПКК низ целата земја беа извршени 466 операции“, соопшти денеска турскиот министер за внатрешни работи, Али Јерликаја, на платформата Х (Твитер).

Тој претходно соопшти дека турските власти спроведуваат широка антитерористичка операција во 18 турски провинции.