За време на израелски воздушен напад врз училиште во Газа, според медицински и безбедносни извори во Појасот Газа, загинале најмалку 100 луѓе. Израелската армија го нападна училиштето, кое служеше како засолниште за раселените лица, во раните утрински часови за време на муслиманската молитва Фаџр, соопшти канцеларијата за медиуми под контрола на Хамас.

Ал Џазира, повикувајќи се на палестинската цивилна заштита, исто така јави дека во нападот загинале повеќе од 100 луѓе, наведувајќи дека десетици жртви изгореле до смрт. Оваа информација не можеше да биде независно потврдена.

Израел: Беа погодени терористи

Израелската армија соопшти дека во текот на ноќта го нападнала командниот центар на исламистичкиот Хамас во училишна зграда во градот Газа на северот од крајбрежниот појас. Според нивните изјави, биле погодени терористи,  командниот центар на Хамас  се наоѓал во училиште до џамијата.

Израелската армија во својата изјава на Телеграм не даде информации за жртви. Пред нападот, беше посочено, преземени биле „бројни мерки“ за намалување на ризикот за цивилите и употребена е прецизна муниција. Хамас ја користеше зградата како засолниште за терористите и командниот персонал, а од таму беа планирани и подготвувани напади врз израелските сили и државата Израел, се додава во соопштението.

Израелската армија уште еднаш нагласи дека Хамас систематски го крши меѓународното право користејќи цивилни засолништа за своите активности. Цивилното население се користи како жив штит за нивните терористички активности, се истакнува во соопштението.

Исламски џихад: „Ужасен масакр“

Исламски џихад, палестинска терористичка организација, веднаш реагираше. „Изборот на утринската молитва како момент за овој ужасен масакр потврдува дека непријателот имал за цел да убие што е можно повеќе цивили, вклучително и деца и постари лица. Израелската армија го користи истиот лажен изговор за напади врз училишта како и за напади при уништување на болници во Појасот Газа," соопшти оваа терористичка организација.

Војната меѓу Израел и Хамас  започна по невиден масовен напад врз Израел од страна на Хамас и други милитантни палестински групи на 7 октомври ланската година. Според израелските податоци, во таа прилика биле убиени околу 1.200 луѓе. Исто така, околу 250 луѓе беа киднапирани и однесени како заложници во Појасот Газа. Како одговор, Израел оттогаш спроведува интензивни воени операции во Појасот Газа. Според податоци на Министерството за здравство под контрола на Хамас, кои не може да се потврдат независно, досега се убиени речиси 39.700 луѓе.