Во тек се медицински испитувања на двете лица за кои постои сомнеж дека се инфицирале со смртоносниот Марбург-вирус, кој предизвикува висока температура, крварење и други симптоми слични на Ебола, која припаѓа во истата група вируси.

Светската здравствена организација (СЗО) вели дека голем процент од заразените од Марбург вирусот умираат. Според градските власти во Хамбург, едно од двете лица до неодамна работело во болница во Руанда, каде се лекувале луѓе заразени со вирусот.

На пат кон Хамбург двајцата развиле симптоми слични на грип. Тие биле пренесени во болница од главната железничка станица во Хамбург во специјално „инфективно возило“, соопшти портпарол на противпожарната служба во градот.  

Еден перон на станицата бил накусо затворен, но потоа продолжил со работа. 

Вирус за кој нема лек   

За Марбург-вирусот не постои вакцина ниту антивирален третман, според СЗО.

Во пандемијата на Ебола вирусот во 2013 година на западот на Африка починаа над 10 илјади луѓе за три години. 

Марбург-вирусот предизвикува мускулни болни, грчеви во стомакот, дијареја и повраќање крв.

Според податоците на американските здравствени служби, во Германија немало појава на оваа болест од 1967 година.

Вирусот го носи името на истоимениот германски град затоа што токму таму, во 1967 година, група лабораториски истражувачи заболеа од дотогаш непознатиот вирус по контакт со експериментални мајмуни.

Заразата не се пренесува преку воздух, туку само преку директен контакт со телесни течности на заболениот, како крв. Периодот на инкубација е од два до 21 ден.