Повеќе од две години по официјалниот почеток на разговорите за прием на Албанија во ЕУ, преговорите денеска (15.10) влегуваат во следната фаза. Двете страни ќе се сретнат на маргините на состанокот на 27-те министри за европски прашања во Луксембург. Ќе биде отворен првиот кластер во преговорите, кој се однесува на демократските институции во Албанија. Напредокот со реформите во кластерот 1 (правосудство и основни права, правда, слобода и безбедност, јавни набавки, статистика, финансиски надзор) го одредува вкупното темпо на преговорите. 

Албанија влезе во НАТО во 2009 година, а истата година поднесе барање за влез во ЕУ. Првата меѓувладина конференција за пристапни преговори се одржа во јули 2022 година. Напредокот на Албанија досега беше поврзан со напредокот на Северна Македонијана патот кон ЕУ. Земјите од Унијата ја напуштија оваа практика во септември, така што Албанија е прва земја кандидат за членство која отвора преговори по изменета метолодологија на проширување, соопшти унгарското претседателство со ЕУ. Како особено проблематични прашања за Албанија важат корупцијата и организираниот криминал.