Европската унија денеска одобри дополнителна воена помош за Украина во износ од 500 милиони евра, во период во кој официјален Берлин се соочи со притисок да испорача тенкови „Леопард 2“ од германско производство во Киев.

Повикувајќи се на дипломатки извори во ЕУ, новинските агенции известуваат дека е одобрен пакет од 500 милиони евра воена помош заедно со дополнителни 45 милиони за „несмртоносна опрема“ за воена обука на ЕУ за Украина. 

Договорот за седмиот пакет помош беше одобрен на состанокот на 27-те министри за надворешни работи на земјите членки на ЕУ, откако минатата недела не беше постигнат договор за испраќање тенкови „Леопард 2“ во Украина.

Министрите за надворешни работи на ЕУ разговарале и за 10-тиот пакет санкции против Русија, кој треба да биде усвоен пред годишнината од рускиот напад на 24 февруари. Според дипломатите, се планира ограничување на цената на дизелот и другите нафтени деривати. За ова е потребна едногласна одлука на земјите-членки.

Во имеѓувреме има и раздвижување во дебатата за испорака на борбени тенкови „Леопард 2“ во Украина: Полска официјално ќе побара од германската влада дозвола за испорака на тенковите  во Украина. Ова го изјави полскиот премиер Матеуш Моравјецки. Моравјецки не наведе точен датум за барањето.

Германските тенкови „Леопард“, кои ги користат армиите ширум Европа, се сметаат за најпогодни за Украина, но Берлин сѐ уште нема донесено одлука за испраќање на тенковите во Киев.