Амбасадорите на земјите членки на Европската унија во петокот (14 мај, 2024) „начелно“ се согласија официјално да започнат пристапните преговори со Украина и со Молдавија, соопшти белгиското претседателство со Европската унија . Одлуката треба да биде официјално одобрена на состанокот на Советот на министри за надворешни работи на ЕУ во наредната недела.

Украина поднесе барање за пристапување кон ЕУ набргу по почетокот на руската агресорска војна во Украина во февруари 2022 година. Таа и соседна Молдавија добија кандидатски статус четири месеци подоцна.

ЕУ „начелно“ се согласува за почеток на преговорите

„Амбасадорите начелно се договорија за преговарачката рамка за пристапните преговори на Украина и Молдавија“, соопшти белгиското претседателство.

Се вели дека првите меѓувладини конференции ќе се одржат на 25 јуни. Белгија претседава со Европската унија до 30 јуни.

Претседателот на Советот на ЕУ, Шарл Мишел го поздрави договорот во објава на социјалната мрежа Х (поранешен Твитер).

„Ние ги исполнуваме нашите ветувања и ќе ве поддржиме на вашиот пат кон членство“, рече Мишел.

Оваа одлука доаѓа седум дена откако Европската комисија соопшти дека и Киев и Кишињев ги исполнуваат сите критериуми за официјален почеток на пристапните преговори.

Украина и Молдавија соочени со долгогодишни преговори

Критериумите вклучуваа мерки за борба против корупцијата, за ограничување на моќта на олигарсите и за подобра заштита на правата на етничките малцинства. 

Пред Украина и Молдавија, меѓутоа, се години на преговори со Европската унија .

Земјите кандидатки веројатно ќе се соочат со долгогодишни реформи пред да ги исполнат критериумите за членство во ЕУ.

По Белгија, Унгарија е следната која ќе го преземе ротирачкото претседавање со  Европската унија. Будимпешта во минатото се спротивставуваше на помошта на ЕУ за Украина поради руската инвазија и изразуваше сомневање во оценката на Европската комисија дека Киев е подготвен за пристапни преговори.