Лидерот на СДСМ, Венко Филипче, во пресрет на вториот круг од локалните избори во недела - 2 ноември, се пожали на притисоци и заплашувања. Тој на прес-конференција во Скопје рече дека нивни кандидати за градоначалници се соочиле со притисоци, заплашувања и злоупотреба на институциите од страна на ВМРО-ДПМНЕ и ЗНАМ.

„И за време на периодот во првиот круг и во изминатите две недели сведоци сме на континуирани притисоци и врз нашите кандидати, членовите на тимовите, од страна на полицијата, единиците за брзо распоредување, од службите за социјална работа, од единиците на Управата за јавни приходи. Тоа го детектиравме во буквално сите општини посебно засилено во 17 општини во очи на вториот круг“,рече Филипче.

Според него, карактеристика на ВМРО-ДПМНЕ е секогаш кога се на власт да го злоупотребуваат државниот апарат и да се обидуваат и да спроведуваат поткуп кај граѓаните. Тој ги повика членовите и граѓаните во општините каде што партијата нема кандидати, да гласаат по сопствено убедување и вредностите.

„Нека се јават - ќе провериме“’

Премиерот Христијан Мицкоски ги отфрла обвинувањата за притисоци врз кандидатите на опозицијата. Вели дека ова се најтранспарентни и најфер организирани избори во поновата историја на демократска Македонија.

„Тоа што одделни политичари имаат проблем со Фројд па совеста работи, и мислат дека тоа што тие би го правеле и го проектираат на политичкиот противник е така, мислам дека тој начин на однесување не е добар и мислам дека тоа не носи поени“, рече претседателот на ВМРО-ДПМНЕ, како одговор на новинарско прашање за обвинувањата на Филипче дека власта вршела притисоци врз нивни кандидати за градоначалници.

Мицкоски вели дека и граѓаните се сведоци дека такво нешто не само што не постои туку „тоа е надвор од неговата лична филозофија и ако имаат индиции да пријават да се провери“.

„Доколку имаат каков било индикатор дека тоа се случува, мојот телефон го знаат слободно нека ми се јават да пријават да провериме дали е тоа така, но јас одговорно тврдам дека не само што нема, туку овие локални избори поминаа во најмирна и најдемократска атмосфера и очекувам така да помине и гласањето в недела“, вели првиот човек на ВМРО-ДПМНЕ.