Претседателот на македонското Собрание, Африм Гаши се коригираше - вели дека Косово е родно место и татковина на неговите родители, додека Северна Македонија е неговата татковина. По повикот на мандатарот, Христијан Мицкоски да се извини доколку навистина за медиуми во соседството рекол дека Косово е неговата татковина, Гаши во објава преку социјалните медиуми објаснува што всушност сакал да каже. 

Искривување на вистината 

„Во однос на прашањето за мојата татковина, свесен сум за обвинувањата и искривувањата од различни медиуми кои се обидуваат да привлечат внимание. Како претседател на Собранието на сите граѓани на Република Северна Македонија, сакам да појаснам дека Африм Гаши е роден во Скопје, каде живее и работи со своето семејство, а негова татковина е Северна Македонија“, вели тој.

Гаши појаснува дека точната изјава во неговото интервју била: „Косово е родно место или татковина на моите родители и јас го почитувам како такво заради нив“. 

„Нема корист од изјавите за патриотизам“ 

„Сепак, верувам дека се разбираме доволно добро за да не бараме детални објаснувања за поимите како родно место, татковина или мајковина, бидејќи албанскиот јазик користи и сложена именка што комбинира мајка и земја. За мене најважно е преку нашите постапки да покажеме како ја гледаме нашата земја, која е нашата посветеност кон неа, кои се нашите придонеси и да правиме разлика меѓу оние кои ја градат и збогатуваат и оние кои ја уништуваат и крадат таа. Од тврдењата и изјавите за патриотизам граѓаните немаат никаква корист, а ние не сме тука да се натпреваруваме кој е по патриот. Јас не уживам во такви дебати и ова е мојата конечна изјава за оваа тема“, вели тој.

Мицкоски во четвртокот (06.06), по доделувањето на мандатот од страна на претседателката Гордана Сиљановска Давкова, рече дека не ја слушнал изјавата на Гаши, но дека тој треба да се извини доколку навистина изјавил дека Косово е неговата татковина. 

„Мислам дека неговата татковина е Македонија. И од тоа што сум го разговарал со него, сум слушнал лично од него дека наша заедничка татковина е нашата заедничка Македонија. Ако има таква изјава, тогаш мислам дека треба да им се извини на граѓаните на Македонија и тоа треба час поскоро да го направи, бидејќи од тука тој зема плата и од страна на Македонците, Турците, Албанците, Власите е избран за претседател на македонското Собрание“, рече Мицкоски.