Првата група германски војници пристигна во понеделникот во Литванија како дел од новата бригада која постојано ќе биде стационирана на источното крило на НАТО.

Тимот од околу 20 вработени ќе започне со поставување на базата, а на крајот ќе им се придружат околу 4.800 германски војници. Бригадата, која ќе го носи името 45-та тенковска бригада, ќе биде целосно оперативна до 2027 година.

„Ова е прв пат трајно да стационираме таква единица надвор од Германија“, изјави германскиот министер за одбрана Борис Писториус на прошталната церемонија во понеделникот во Берлин.

„Знам дека има уште многу да се направи, вклучително и на лице место. Инфраструктурата мора да биде исправна, мора да има касарни, сместување“, рече Писториус.

„Има уште многу да се направи и од литванската страна“, додаде министерот. „Ќе направиме сѐ што можеме за да ја опремиме бригадата од самиот почеток."

Зошто Германија стационира бригада во Литванија?

Германското Министерство за одбрана соопшти дека новата воена база има за цел  да ја одврати Русија  од понатамошни напади на нејзините соседи по инвазијата врз Украина.

Литванија има граница со руската ексклава на Балтичкото Море, Калининград и блискиот сојузник на Москва, Белорусија. Според  германската армија,  Бундесверот, ова ја прави Литванија најекспонирана држава на источното крило на НАТО.

Западните воени аналитичари долго време гледаат на јазот Сувалки како потенцијална точка на удар во евентуален напад на Русија.

Целта е постојано да се стационираат 4.800 војници и околу 200 цивили во Литванија во  координација со НАТО.

Берлин ќе распореди два борбени баталјони од германските покраини Баварија и Северна Рајна-Вестфалија за да го формираат јадрото на новата бригада во Литванија.

Третиот баталјон ќе биде мултинационална борбена единица на НАТО како дел од силите за зголемено напредно присуство на алијансата. Баталјонот е веќе во Литванија, под германска команда, со ротирачки персонал од неколку други нации.

За Литванците,  германското распоредување на војници  е посакуваното уверување за обврската на НАТО да пружи помош во безбедноста на земјата. Создавањето услови за бригадата на Бундесверот ќе ја чини Литванија околу 800 милиони евра во следните неколку години.

Новото воено присуство на Германија во Литванија наиде на критики во Русија. Ова ги ескалира сегашните тензии, изјави портпаролот на претседателскиот кабинет во Москва, Дмитри Песков.