Германската влада денеска ја забрани организацијата Исламски центар во Хамбург, обвинувајќи ја дека ги промовира ставовите на официјален Техеран и го поддржува либанскиот Хезболах, соопшти Министерството за внатрешни работи во Берлин. 

Забраната на Исламскиот центар во Хамбург (ИЗХ) и неговите подружници во другите делови на Германија уследи по извршените полициски претреси на 53 локации во ноември.

Министерката за внатрешни работи Ненси Фезер рече дека доказите собрани во истрагата „ги потврдиле сериозните сомнежи дотолкава мера што забраната е наредена денеска“.

Фезер во изјавата наведе дека ИЗХ „промовира исламистичко-екстремистичка, тоталитарна идеологија во Германија“ и дека нејзините подорганизации „исто така, ги поддржуваат терористите на Хезболах и шират агресивен антисемитизам“.

Министерството наведе дека „како директен претставник на иранскиот врховен водач на исламската револуција“, ИЗХ ја шири „идеологијата на Исламската револуција на агресивен и борбен начин и се обидува да донесе таква револуција во Германија“.

ИЗХ минатата есен соопшти дека „осудува секаква форма на насилство и на екстремизам и оти секогаш се залага за мир, толеранција и за меѓурелигиски дијалог“.

Министерството за внатрешни работи соопшти дека поради забраната ќе бидат затворени четири шиитски џамии во Германија и дека имотот на ИЗХ ќе биде конфискуван.