Германскиот министер за одбрана, Борис Писториус, синоќа најави двојно зголемување на воената помош која неговата земја првично ја планираше за Украина за 2024 година, на осум милијарди евра.
„Тоа е силен сигнал за Украина кој покажува дека нема да ја изневериме. Тоа е важен сигнал во момент кога Украина треба да ја продолжи борбата, додека дел од меѓународното внимание е насочено кон Израел и Газа“, рече Писториус.
Зголемувањето на оваа воена помош одговара на „искуството кое го имавме годинава и кое покажа дека планираните износи беа брзо исцрпени“, додаде тој.
Германската влада првично планираше пакет помош, главно во воена опрема, во износ од четири милијарди евра. Но, партиите во владината коалиција на канцеларот Олаф Шолц штотуку се договорија за удвојување на сумата. Одлуката мора да биде формализирана за време на гласањето на Комисијата на Бундестагот во четврток, 16 ноември, 2023.

Од почетокот на руската инвазија, Германија даде голем придонес во поддршката на Киев, обезбедувајќи ѝ на Украина околу 22 милијарди евра хуманитарна, финансиска и воена помош.
Берлин испрати тенкови, оклопни возила, муниција и системи за противвоздушна одбрана во Киев.
Но, Германија не сака да ги испорача ракетите со долг дострел Таурус поради страв дека ќе бидат искористени за гаѓање на руска територија.
Германската најава доаѓа во време кога се чини дека украинската контраофанзива против руските сили е во застој.