Германскиот парламент му го одзеде имунитетот на политичарот од партијата Алтернатива за Германија (АфД), Максимилијан Кра. Со тоа, парламентот го одобри извршувањето на налозите за претрес и заплена  на потенцијални доказни материјали против Кра. Политичарот од АфД, меѓу другото, е осомничен за корупција додека бил член на Европскиот парламент.

Претседателката на Бундестагот, Јулија Клекнер, ја прекина дебатата за законот за здравствена нега со цел да се одржи итно гласање. Политичарката од ЦДУ не го именуваше лицето за кое станува збор, но неговото име е наведено во документ на Бундестагот за случајот. Според Клекнер, одлуката е донесена со „гласовите на сите парламентарни групи“ - вклучувајќи ги и гласовите на пратеничката група на партијата на Кра - АфД.

Истрага за корупција и перење пари

Позадина на случајот е постапката која ја води обвинителството во Дрезден. Во мај, Главното обвинителство во Дрезден отвори истрага против Кра за корупција и перење пари во врска со кинеските уплати. Се наведува дека обвиненијата се однесуваат на неговите претходни должности како член на Европскиот парламент. Властите сега сакаат да утврдат дали „постојат доволно основи за обвинение или дали постапката мора да се прекине“.