Германскиот производител на оружје Рајнметал преговара со властите во Киев за отворање фабрика за тенкови во Украина, а генералниот директор на оваа компанија, Армин Папергер, изјави дека разговорите со Украина „ветуваат“ и оти се надева дека одлуката ќе биде донесена „во наредните два месеца“.

„Фабрика на Рајнметал може да се изгради во Украина за околу 200 милиони евра“, рече Папергер, додавајќи дека таквата фабрика „ќе може да произведе годишно до 400 борбени текови од типот Пантер“.

Шефот на Рајнметал е уверен оти фабриката во Украина, може да се заштити од руски воздушни напади.

Папергер тврди дека сојузниците на Киев во овој момент испраќаат доволно оружје за одбрана на Украина, но таа количина оружје не е доволна Украина повторно да ги заземе своите територии. Според него, на Украина за победа во војната ѝ се потребни меѓу 600 и 800 тенкови. Дури и ако Бундесверот би му ги дал на Киев сите 300 тенка кои ги има тоа не би било доволно, оцени Папергер и додаде дека во концернот се работи со полна пареа. 

Војната веројатно ќе трае со години, заклучува Папергер. 

Германскиот канцелар, Олаф Шолц, неодамне рече дека Берлин продолжува да ја шири својата воена помош за Киев. Како пример, ја наведе одлуката, на Украина да ѝ се испорачаат борбени пешадиски возила „Мардер“, главните борбени тенкови „Леопард 1“ и „Леопард 2“, како и друга техника.

Во моментов украинските војници ја продолжуваат обуката за работата на „Леопард 2“. Берлин ќе испрати вкупно 18 вакви тенкови за Киев. Како што е порано соопштено, износот за помош која Германија ја пружи или ја гарантирала на Украина од февруари 2022 година, изнесува над 14 милијарди евра. Притоа не се мисли само на воена помош, туку и на хуманитарна и на финансиска.