Пофалби за канцеларот Олаф Шолц и неговата коалициска влада која дејствува решително: нова студија покажува дека германската влада бележи „исклучително ветувачки резултати“ на половина од својот мандат.
Канцеларот Олаф Шолц (СПД), министерот за економија и климатска заштита Роберт Хабек (Зелени) и министерот за финансии Кристијан Линднер (ФДП) Фотографија: LISI NIESNER/REUTERS
Реклама
Како да се објасни следново: во актуелното истражување на јавното мислење „Германски тренд“ (Deutschlandtrend), само 19 отсто од Германците се задоволни од владата на социјалдемократите (СПД), Зелените и либералите (ФДП), додека студија на Фондацијата Бертелсман, која штотуку беше објавена, покажува дека оваа владина коалиција, која е на власт во Германија од декември 2021 година, генерално работи добро.
Коалицискиот договор под лупа
Оваа, на прв поглед, очигледна противречност може брзо да се разреши со повнимателен поглед: студијата спроведена од приватната фондација Бертелсман е научно заснована анализа на коалицискиот договор и изборните ветувања формулирани во него. Згора на тоа поткрепена е со репрезентативна анкета.
„Овој метод овозможи да се спореди вистинскиот и перцепираниот статус на исполнување на коалициските ветувања“, се наведува во воведниот текст на студијата. За да го направите ова, двоецот автори, Роберт Феркамп (Фондацијата Бертелсман) и Тереза Матис (Универзитетот во Трир) ги разгледаа сите 453 главни и помали ветувања на германската коалициска влада и проверија што се случило со нив во меѓувреме.
Роберт Феркамп од фондацијата Бертелсман, еден од авторите на студијатаФотографија: Fabian Sommer/dpa/picture alliance
Повеќе пари за децата и побрзо до германско државјанство
Меѓу ветувањата се и големите политички реформи, како што е борбата против детската сиромаштија и планираното воведување основна финансиска поддршка, за кои коалицијата јавно расправаше со недели, а потоа најде компромис. Тука е и новиот закон за државјанство чија цел е побрзо стекнување на германски пасош. СПД, Зелените и ФДП се договорија за таа централна тема дури по жестоки дискусии и расправии.
Токму овие и други контроверзни теми ја формираат сликата за владата, предводена од канцеларот Олаф Шолц, кај голем дел од населението и предизвикуваат сѐ поголемо незадоволство. Според студијата, речиси две третини од коалициските ветувања се или целосно спроведени или е покренато нивното спроведување.
Јавни расправии и отворени прашања
Роберт Феркамп ги сумира резултатите од студијата на следниов начин: „Севкупно погледнатто, тоа е многу ветувачки биланс на работата на владата во првата половина од мандатот, кој, сепак, е засенет од јавни спорови на коалициските партнери и многу отворени прашања. "
Од гледна точка на тимот кој работеше на студијата, коалицискиот договор, склучен во 2021 година, е многу амбициозен поради големиот број ветувања. Во споредба со претходната коалициска влада на социјалдемократите и демохристијаните (ЦДУ/ЦСУ), бројот на ветувања се зголеми од 296 на 453. Сегашната владејачка коалиција, популарно наречена „семафор коалиција“ (поради партиските бои, црвена на СПД, жолта на ФДП и зелена на Зелените), си постави 50 отсто поконкретни цели.
Олаф Шолц го претстави коалицискиот договор меѓу СПД, Зелените и ФДП во декември 2021 година.Фотографија: Michael Kappeler/dpa/picture alliance
Коалициски договор со многу ветувања и големи амбиции
„Големиот број на ветувања ја одразува како сложеноста на коалицијата како сојуз на три програмски различни партии, така и многу поголемиот степен на амбициозност и сложеност на договорот“, објаснува Тереза Матис од Универзитетот во Трир.
Но, наспроти тоа, перцепцијата на јавноста за „семафор владата“ е таква што само 12 отсто од испитаниците сметаат дека ќе бидат исполнети „сите, речиси сите или голем дел“ од договорените коалициски ветувања, а дури 43 отсто претпоставуваат дека ќе бидат спроведени само „мал дел од ветувањата или едвај некое од нив“.
Реклама
Ново придвижување на соработката и самопрезентација?
За да го подобри својот углед меѓу населението, на владата во Берлин ѝ е потребен нов почеток во коалициската соработка, но и во сопственото претставување и презентација во рамките на коалицијата, вели Волфганг Шредер од берлинскиот тинк-тенк „Прогресивен центар“ (Das Progressive Zentrum), кој учествуваше во изработката на студијата. Неговиот заклучок гласи: „Споровите во владејачката коалиција кои јавно се пренесуваат доведуваат до потценување на вистинскиот учинок на владата и дека таа посветено и доследно ги исполнува ветувањата наведени во коалицискиот договор“.
Се чини дека резултатите од студијата ја отсликуваат дилемата со која политичките коалиции во Германија се очигледно суштински соочени: „Главниот предизвик за сите коалициски влади и партии во оваа земја останува ниската толеранција за фрустрација и подготвеноста за компромис од страна на гласачите кога донесуваат судови“, пишуваат Роберт Феркамп и Тереза Матис.
Министрите во новата германска влада
Германија има нова влада. Кои се лицата во кабинетот на Олаф Шолц?
Фотографија: picture-alliance/dpa/U. Baumgarten
Шолц е наследник на Меркел
Олаф Шолц (63) ја донесе својата партија до победа, а сега стана наследник на Ангела Меркел. Шолц добро го познава политичкиот бизнис. Тој со години беше министер и градоначалник на Хамбург. Негов централен проект е зголемувањето на минималната плата.
Фотографија: Michael Kappeler/picture alliance/dpa
Шмит, човекот од позадина
Волфганг Шмит (51) е новиот Канцлерамт-министер. Тоа се чини и логично. Се вели дека никој не го познава Олаф Шолц подобро од Шмит. Двајцата се од Хамбург, двајцата работат заедно веќе 20 години. Шмит веруваше дека Шолц може да биде канцелар уште кога тоа на многумина им изгледаше невозможно. Сега ветува дека ќе му дава поддршка на Шолц и ќе му го „држи грбот слободен“ секогаш кога е тоа можно.
Фотографија: Kay Nietfeld/picture alliance/dpa
Борецот против пандемијата
Карл Лаутербах е изненадување во владата. Многу од граѓаните и политичарите посакуваа тој да биде министер за здравство. Но, тој првично не беше предвиден за таа функција. Сега Олаф Шолц го фали како „стручњак“. 58-годишниот Лаутербах е медицинар и здравствен економист. Во пандемијата беше медиумски сеприсутен, преудпредуваше и укажуваше. Се вели дека сега неговиот ресор има „највисок приоритет“.
Фотографија: picture alliance/dpa
Повторно жена за ресорот одбрана
Кристине Ламбрехт претходно беше министерка за правда, а сега заминува на функцијата министерка за одбрана. 56-годишната адвокатка презема традиционално тежок ресор. Таа сака да ја направи воената професија поатрактивна. Мисиите на Бундесверот во странство во иднина треба постојано да бидат евалуирани и секогаш да постои стратегија за излез. Таа е трета жена по ред на оваа функција.
Фотографија: Hannibal Hanschke/REUTERS
Хајл останува на фунцкијата
Хубертус Хајл (49) ќе го работи она што и досега го работеше - и натаму ќе биде надлежен за ресорот „труд и социјала“'. Тој важи за приземен и прагматичен. Минималната пензија и минималната плата се поврзуваат со неговиот политички профил. За новиот мандат најави дека ќе се бори за повеќе права при работењето од дома (Home-Office).
Клара Гејвиц е една од двајцата источни Германци во владата. Таа го добива новото Министерство за градежништво и домување. Годишно би требало да се градат по 400.000 нови станови. 45-годишната Гејвиц потекнува од Бранденбург, каде со години е активна на локално и на покраинско ниво. Во СПД е вицешефица на сојузно ниво. Шолц во неа гледа „многу голем талент“.
Фотографија: Reuters/A. Hilse
За внатрешната политика - силна жена од Хесен
Министерството за внатрешни работи првпат го раководи жена. Ненси Фезер (51) доаѓа од Хесен, каде раководеше со покраинскиот огранопк на СПД и беше шефица на пратеничката група. Таа своето тежиште сака да го стави на борбата против десниот екстремизам и вети добро опремена полиција. Луѓето имаат право на безбедност во земјата, вели таа.
Фотографија: Hannibal Hanschke/REUTERS
Шулце - нови перспективи за глобални теми
53-годишната Свенја Шулце претходно беше министерка за екологија. Сега го презема Министерството за економска соработка и развој. „Глобалните теми“ ѝ биле секогаш предмет на интерес, рече Шолц при претставувањето на владата. Таа се снаоѓа на „меѓународниот паркет“. Шулце си создаде име пред сѐ во делот на заштита на климата.
Фотографија: Toni Kretschmer/BMU/dpa/picture alliance
Линднер ќе ја чува државната каса
Кристијан Линднер успеа - функцијата министер за финансии важи за најважната функција по канцеларската. 42-годишникот ја води либералната ФДП од 2013 година. Притоа имаше и тешки периоди, време кога партијата беше надвор од парламентот (2013-2017 година). Сега либерал го презема Министерството за финансии, иако на изборите Зелените освоија повеќе гласови од ФДП.
Марко Бушман: 44-годишниот правник е нов министер за правда. Како парламентарен раководител на ФДП тој добро ја познава партијата, работеше на нејзино реформирање во вонпарламентарните времиња. Во изборната кампања се залагаше за либерална корона-политика.
Третата функција од ФДП ја добива актуелниот генерален секретар на партијата - Фолкер Висинг (51). Тој го презема Министерството за сообраќај и дигитални технологии. Висинг има искуство со семафор-коалиции. Во покраината Рајнланд Пфалц тој веќе беше член на ваква покраинска влада. На сојузно ниво Висинг беше дел од малиот круг луѓе кој иницираше први сондирачки разговори.
Фотографија: Michael Kappeler/picture alliance/dpa
Штарк-Вацингер сака „образовна револуција“
Четвртото министерство за ФДП е Министерството за образование и наука. Го презема 53-годишната Бетина Штарк-Вацингер. Таа е пратеничка од ФДП во Бундестагот четири години и преговараше за коалицискиот договор. Уште во кампањата се изјаснуваше за образовно-политички теми и објави текст во кој ја претстави својата визија. Таа се залага за „темелна системска промена“.
Фотографија: Michael Kappeler/picture alliance/dpa
Надворешни работи наместо Канцлерамт за Бербок
Аналена Бербок (40) беше шпиценкандидатка на Зелените во изборната кампања и успеа да го подобри резултатот на партијата во споредба со изборите во 2017-тата. Но, тоа не беше доволно за да стане канцеларка, меѓу другото и затоа што во текот на кампањата имаше неколку гафови. Сега е избрана за министерка за надворешни работи. Таа, по Јошка Фишер, е втор член на Зелените кој бил на оваа функција.
Фотографија: Bernd Settnik/picture alliance/dpa
Хабек - новиот супер-министер
Роберт Хабек (52) е копретседател на Зелените од 2018 година. Во трката за кандидат за канцелар од редовите на Зелените загуби од Бербок. Сега Хабек, по професија филозоф, човек кој беше покраински министер во Шлезвиг Холштајн, стана сојузен министер и тоа во новосоздадениот ресор за економија и заштита на климата. Хабек ќе биде и вицеканцелар.
Фотографија: Reuhl/Fotostand/picture alliance
Ездемир победи во борбата за министерски фунцкии
Поранешниот шеф на Зелените, Џем Ездемир (55), би требало да го преземе Министерството за храна и земјоделство. Пред да падне одлуката се водеше огорчена борба за министерските функции. Шефот на пратеничката група на Зелените, Антон Хофрајтер, кој се вбројува во левото партиско крило, остана со празни раце. „Реалистот“ Ездемир е прв министер со турско потекло во Германија.
Фотографија: Getty Images/AFP/J. MacDougall
Лемке ќе биде надлежна за природната средина
Ресорот екологија, заштита на природата, нуклеарна безбедност и заштита на потрошувачите го презема Штефи Лемке (53). Оваа источна Германка како сојузна раководителка на Зелените 11 години управуваше со судбината на партијата (2002-2013). Лемке има студирано земјоделство. Една од нејзините тежишни точки во Бундестагот беше темата - уништување на морињата.
Фотографија: Hendrik Schmidt/picture alliance/dpa
Шпигел од Мајнц оди за Берлин
Семејство, сениори, жени и младина - министерството надлежно за овие прашања го презема Ане Шпигел. Темата би требало да ѝ е позната, со оглед на тоа што во покраината Рајнланд Пфалц веќе беше покраинска министерка за семејство, жени и младина. 40-годишната Шпигел се вбројува во левото крило на Зелените.
Фотографија: Armando Babani/AFP
Рот ќе раководи со културата
Клаудија Рот ќе биде надлежна за културната политика. 66-годишната Рот како државна министерка за култура ќе биде надлежна и за Дојче веле. Поранешната лидерка на Зелените е едно од најпознатите лица на партијата. Во претходниот мандат оваа поранешна менаџерка на анархо-бендот Ton Steine Scherben беше потпретседателка на Бундестагот.
Иако 85 отсто од испитаниците сметаат дека е „многу важно или важно“ партиите навистина да ги спроведат целите и плановите од нивните изборни програми, само 40 отсто се согласиле дека може да постојат „прифатливи причини“ за неисполнување на изборните ветувања. Од тоа, само нешто помалку од една третина (31 процент) ја гледаат потребата од компромиси како прифатлива причина за неисполнување на ветувањата.
„Се чини дека парламентарната форма на владеење, која се заснова на компромиси, многумина ја гледаат како предавство на партиските принципи и идеали“, заклучува авторското дуо Феркамп-Матис, кое ја изготви студијата на фондацијата Бертелсман.