„Насобраните на протестот овојпат се упатија кон Градското Собрание, во кое сакаа насилно да влезат. Жандармеријата употребила солзавец, јавуваат локалните медиуми“, пишува најголемата германска новинска агенција ДПА.

Агенцијата ги пренесува официјалните податоци, според кои триесет полицајци се повредени, а повеќе од триесет демонстранти се уапсени.

Извештаите на интернет порталите на германските медиуми најмногу се засноваат на тој краток извештај на ДПА, во кој се потсетува дека дел од опозицијата ја обвинува власта за сериозна изборна измама.

Порталите го цитираат претседателот Александар Вучиќ, кој во неделата (24.12) изјави дека има цврсти „докази“ оти насилството било планирано и дека не е во тек никаква „револуција“.

„Јуриш на Собранието со шипки и камења“, гласи насловот на таблоидот „Билд“.

Во извештајот се потсетува дека меѓународната мисија за набљудување на изборите утврди низа „неправилности“, од насилство и купување гласови до наменско полнење на гласачки кутии.

„Министерството за надворешни работи во Берлин, повикувајќи се на извештајот, објави дека таквите прекршувања се 'неприфатливи за земја со статус на кандидат за ЕУ““, потсетува „Билд“.