Пад на приходите во угостителството

Германските угостители остваруваат сè помалку  промет, а во исто време губат муштерии.

Приходите, кога се земаат предвид фактори како што е инфлацијата, се намалени за дополнителни 3,7 проценти во првата половина од годинава во споредба со веќе слабиот период од претходната година, објави Сојузниот завод за статистика.

Инфлацијата и цените како клучен фактор

Само значителното зголемување на цените им помогна на  угостителите и хотелиерите  да одржат ниво на приход што им обезбедува егзистенција.

Во номинални услови, односно, без да се земе предвид инфлацијата, приходите беа само 0,1 процент пониски од претходната година.

Хотелиерите со помал пад од рестораните

Со реален пад од 4,1 процент, угостителската бранша е погодена од овој развој повеќе од хотелите и другите даватели на сместување, кои мораа да се справат со пад на прометот од 2,6 проценти.

Потрошувачите стануваат поштедливи

Според Германското здружение на хотели и ресторани (Дехога), многу потрошувачи станале поштедливи.

„Чувствителноста на цените и воздржаноста на потрошувачите се значително зголемени“, изјави неодамна претседателот на Дехога, Гвидо Цолик. „Многу гости поретко јадат надвор, избираат поевтини оброци и се откажуваат од дополнителни јадења како предјадење или друг пијалок.“

Високи трошоци и ДДВ како товар

Зголемените трошоци претставуваат голем товар за многу мали и средни семејни бизниси. „Ситуацијата во индустријата е напната, а  перспективите за втората половина од годината не се одлични“,  вели Цолик.

Полната стапка на ДДВ од 19 проценти за потрошувачката на храна, која е повторно на сила од почетокот на 2024 година, веројатно придонесла за падот.

Здружението Дехога сега се надева на нова помош од политиката. Според најавите од сојузната влада на  Германија   составена од  ЦДУ/ЦСУ и СПД, стапката на ДДВ повторно ќе се намали следната година на ниво од 7 проценти, што важеше и во ерата на пандемијата на коронавирусот.

Летниот период со дополнителен пад

По краткиот пораст за Велигден, ситуацијата дополнително се влоши во текот на летото. Во јуни, прометот беше за 5,9 проценти помал во реални услови отколку во истиот месец минатата година, а кога ќе се вклучи факторот на раст на цените, прометот беше за 3,4 проценти помал отколку пред една година.