Поранешната американска министерка за надворешни работи Хилари Клинтон во изјава до Комитетот за надзор на Претставничкиот дом на САД вели дека не се сеќава на никакви средби со починатиот сексуален престапник Џефри Епстин.  Демократката вчера (26.02) исто така рече дека немала сознанија за криминалните активности на Епстин. „Не се сеќавам дека некогаш сум се сретнала со г-дин Епстин“, изјави таа и додаде дека никогаш не летала со неговиот авион и никогаш не го посетила неговиот остров или неговите домови.

Клинтон го обвини комитетот предводен од републиканците дека се обидува да го одвлече вниманието од врските меѓу сегашниот американски претседател Доналд Трамп и Епстин.

Сопругот на Хилари Клинтон, поранешниот американски претседател Бил Клинтон, треба да биде испрашуван денеска. Тој патувал со авионот на Епстин неколку пати на почетокот на 2000-тите, но негира какво било кривично дело.

Клинтонови првично одбија да се појават пред комитетот, но попуштија кога тој им се закани со постапка поради непочитување на Конгресот.

Претседателот на комитетот, републиканецот Џејмс Комер, го отфрли обвинението за пристрасност. Никој во моментов не ги обвинува Клинтонови за кривично дело, рече тој. Истрагата се однесува на можни интеракции со Епстин, неговите врски со добротворната работа на Клинтонови и со соработничката на Епстин, Гислен Максвел, која е во затвор.