ИПАРД 3 програмата под закана

ИПАРД 3 програмата, инструментот на ЕУ за поддршка на руралниот развој, се соочува со суспензија на неопределено време поради сериозен корупциски скандал во Платежната агенција, вели Љупчо Николовски, пратеник од СДСМ и поранешен министер за земјоделство. Според него, одлуката за суспензија е донесена во петокот и веднаш стапила на сила.

„Се прекинуваат исплатите кон земјоделците и компаниите кои веќе имаат склучени договори, како и потпишувањето нови договори и објавувањето јавни повици“, изјави Николовски. Според него, Владата ја крие информацијата од јавноста и со тоа се обидува да ги заштити вмешаните во скандалот.

Реакција од Министерството за земјоделство

Од Министерството за земјоделство велат дека нема најави од Брисел за ваква мерка, со која би се прекинала програмата чиј корисник е Северна Македонија.

Министерот Цветан Трипуновски изјави: „Брисел нема најава за блокада на ИПАРД средствата. Напротив, нашата борба против корупцијата и дополнителните проверки кои ги правиме во Агенцијата се пофалени од страна на Брисел“.

Корупција во Платежната агенција

Николовски претходно рече дека причината за суспензијата е случајот со примање мито, поради што во притвор завршија директорот на Платежната агенција и уште четири други лица. Јавниот обвинител веќе започна истражна постапка.

Според СДСМ, под ризик се 128 милиони евра од ЕУ, средства кои се клучни за модернизација на земјоделството во Северна Македонија.

Во периодот на ИПАРД 2 (2017–2024), Македонија реализираше рекордни 2.400 договори, повеќе од Србија, Црна Гора и Албанија заедно. Поради корупцискиот скандал, земјата ризикува да ги изгуби средствата и да го загрози целиот земјоделски сектор, смета Николовски. Тој најави дека ќе предложи измени во законската рамка при изборот на директор на агенцијата, како и јакнење на независноста и контролните механизми со јасна одговорност за секоја злоупотреба.

По акцијата на МВР и Обвинителството, министерот Трипуновски вели дека се преземени дополнителни активности за проверка на работењето на Агенцијата за финансиска поддршка во земјоделството и руралниот развој, со цел да се зајакнат контролите за исплата на ИПАРД средствата.