Може ли да одам маскиран на гласачкото место?

Да. Избирачкиот одбор може да интервенира само ако „изгледот го загрозува општиот ред на избирачкото место или предизвика јавна непријатност“, објаснуваат од прес-службата на претседателката на Сојузната изборна комисија. Избирачкиот одбор може да избрка од избирачкото место луѓе со политички пораки, партиски симболи или забранети симболи на нивната облека. Сојузниот изборен закон предвидува дека не смее да постои влијание „преку збор, звук, пишување или слика“ врз гласачите во и пред избирачкото место. Значи, на гласање не може да се појавите облечени, на пример, како член на ФДП со препознатливо партиско лого. Колку би било проблематично да се гласа како семафор (коалицијата која есеноска се распадна во Берлин се нарекуваше семафор-коалиција, н.з.), Ангела Меркел или во друг политички костим, на крајот одлучуваат луѓето кои раководат со гласањето на лице место.

Може ли да ставам шминка на лицето или да носам маска?

Помошниците при процесот на гласање мора да го потврдат идентитетот на гласачот со споредување на неговиот лик со фотографијата на личната карта. Ако лицето е покриено или не може да се препознае поради тешка шминка, избирачкиот одбор може да побара од лицето да ги отстрани.

Дали може да се пушти музика на гласачкото место?

Претседателката на Сојузната изборна комисија во Германија препорачува тоа да се забрани. Сепак, за тоа се надлежни локалните власти и на крајот секој избирачки одбор. И во овој случај претседателката на Сојузната изборна комисија укажува на принципот дека мора да се спречи секое влијание врз изборите во и околу избирачкото место за да се обезбеди слободно спроведување на изборите.

Може ли да одам на гласачко место пијан или со шише пиво?

Да, сѐ додека нема проблеми и нарушување на редот на гласачкото место. Доколку тоа се случи, избирачкиот одбор може да ги отстрани тие лица од просторијата. Тие ќе може да дојдат повторно да гласаат кога веќе нема да го нарушуваат редот. Инаку, според прес-службата на Сојузната изборна комисија, нема ограничувања „во однос на дозволеното консумирање алкохол или нивото на алкохолизираност“. Гласот даден додека лицето е под дејство на алкохол е исто толку валиден како и гласот даден додека лицето е трезно - главно е крстовите на гласачкото ливче да бидат ставени како што треба. Сепак, Претседателката на Сојузната изборна комисија им препорачува на локалните власти и избирачките одбори да се избегнува консумирање храна и пијалоци донесени однадвор секогаш кога тоа е можно.

Што е со членовите на избирачкиот одбор?

Според прес-службата на Сојузната изборна комисија, нема официјални упатства за ограничувања на степенот на алкохолизираност на членовите на избирачките одбори. Меѓутоа, со оглед на тоа што тие ги извршуваат клучните задачи за да има чисти демократски избори, се препорачува да не консумираат алкохол.

Сојузната изборна комисија исто така советува членовите на избирачките одбори да не носат костими. Сепак, единственото нешто што е забрането е да го покриваат лицето додека работат. „Ова е за да се осигура дека тие ќе останат препознатливи и дека ништо не ја попречува доверливата комуникација.“ И, исто како и гласачите, не смеат да носат облека што укажува на (партиско) политичко убедување или што може да се смета за изборна пропаганда.