Никогаш досега во историјата на Зелените, партија позната по своите програмски дебати без многу место за култ кон личноста, еден човек не бил во толкав фокус на изборната кампања: За предвремените парламентарни избори на 23 февруари 2025 година, Роберт Хабекз се кандидира за канцелар, избран на партискиот конгрес средината на ноември во Визбаден со 96 проценти од гласовите. 

Три екстремно исцрпувачки години 

Хабек има зад себе три напорни години како дел од влада што на крајот се распадна поради внатрешни конфликти. Но, тој е цврсто решен да продолжи и да остане на власт. Иако неговата партија во моментов има поддршка од само 12 до 14 проценти според анкетите. И покрај тоа што на социјалните мрежи наидува на неразбирање и омраза. Според многумина Германци, Хабек и неговите Зелени ги преоптовариле граѓаните со амбициозни планови за климатски промени и енергетска транзиција во време на криза.

Во март 2022 година, Хабек за ДВ изјави: „Секогаш ми беше јасно: Ќе треба да носам одлуки што нема да бидат популарни, што ќе бидат тешки, што ќе бараат жртви од луѓето. Одлуки што можеби нема да бидат прифатени од мнозинството, но сепак мора да се донесат затоа што на долг рок се исправни за земјата.“

Хабек, кој во септември наполни 55 години, всушност е аутсајдер во политиката. Дури пред 20 години, на свои 30-ти години, за првпат се вклучи во Партијата на Зелените како лидер на партијата во Шлезвиг-Холштајн. Подоцна, од 2012 до 2018 година, беше министер за животна средина на оваа најсеверна германска покраина. Пред тоа, заедно со својата сопруга Андреа Палух, пишуваше детски книги и криминалистички романи. Во април 2024 година, на германската телевизија АРД беше прикажан криминалистичкиот филм „Поплавата – смрт на насипот“, базиран на роман од Хабек и неговата сопруга. 

Изборни успеси како партиски лидер 

Од јануари 2018 до изборите во 2021 година, Хабек беше ко-лидер на Зелените заедно со Аналена Бербок, која подоцна стана министерка за надворешни работи. Ова беше успешен период за Зелените, особено на европските избори во мај 2019 година, кога освоија 20,5 проценти од гласовите. По изборите во 2021 година, партијата стана дел од коалицијата со социјалдемократите (СПД) и про-бизнис ориентираната ФДП, наречена „Семафор-коалиција“ според боите на партиите. 

Реформски почеток- а потоа дојде војната 

Првичните планови на трите партии беа насочени кон општествени реформи, а Хабек сакаше, како заменик-канцелар и министер за економија и климатска заштита, да го поттикне одржливиот развој на економијата. Но, веќе во пролетта 2022 година, целата политика се промени: Русија ја нападна Украина, а Германија мораше со рекордна брзина да се откаже од евтините увози на руски гас и нафта.

Долго планираниот гасовод „Северен тек 2“ никогаш не беше пуштен во употреба. Хабек бараше нови добавувачи на гас низ целиот свет, вклучувајќи го и Катар. Таму, во Доха, за ДВ изјави дека наидува на големи сомнежи: „Секако, тука сите знаат дека Германија остро реагира против Русија, дека не го пуштаме во употреба ‘Северен тек 2’ и дека ја нагласуваме заштитата на климата. Но, нивниот став е: Вие нè напуштате кога не напаѓаат бунтовници, кои ги сметаме за терористи, а доаѓате само кога ви треба помош. Тоа ми беше многу јасно кажано.“

Објаснувачот на кризите 

Хабек долго време имаше добра репутација поради ваквите јасни ставови. Тој во многу интервјуа им ја објаснуваше на граѓаните новата реалност по почетокот на војната. Јавно признаваше дека не бил подготвен за сè и ги предупредуваше луѓето за зголемените цени и неизвесностите.

Во февруари 2023 година изјави: „Војната ја започна Путин, а нашата независност од руските испораки значи дека тој повеќе ќе ги нема тие приходи. Дека како општество за тоа плаќаме цена – тоа е неспорно. Висока инфлација, високи цени на енергијата. И, се разбира, многу стравови и грижи кои доаѓаат со тоа.“

Пресврт: Законот за греење 

Но, потоа дојде законот за греење, кој требаше да го замени евтиното гасно греење со топлински пумпи. Законот беше избрзано составен, финансиската поддршка од државата не беше јасна, а пумпите не беа достапни во доволни количини. Популарноста на Хабек падна, а многу граѓани почнаа да го гледаат како изолиран еко-фанатик.

На крајот, владата остана без пари

Во ноември 2023 година, Уставниот суд на Германија забрани владата да пренасочи 60 милијарди евра од ковид-фондовите за климатски мерки. Оттогаш, владата остана без финансии за многу од своите планови. Конфликтите во коалицијата се влошија, а имиџот на Хабек дополнително се наруши.

Отворен за нови коалиции 

И сега? Ќе се врати ли Хабек на пишувањето? Тешко замисливо. Тој и Зелените се отворени за нови коалиции, дури и со конзервативната ЦДУ/ЦСУ, ако е потребно. Хабек не сака неговата политичка кариера да заврши со пропаѓањето на „Семафор-коалицијата“.