Израелската војска соопшти дека нападнала цели во Појасот Газа за кои се верува дека се поврзани со милитантната палестинска група Исламски џихад. Притоа биле убиени неколку луѓе. Израелската армија ја означи операцијата „Штит и стрела“ како одговор на ракетните напади од Појасот Газа врз израелската погранична област во последните недели. Сепак, масовниот напад беше изненадувачки, бидејќи прекинот на огнот беше во сила речиси една недела. 

Израелската армија објави дека тројца џихадисти се убиени. Станува збор за Калил Бахитини, командант во северниот дел на Газа, кој се смета за одговорен за неодамнешните ракетни напади врз Израел, Џахед Ахнам, шеф на воениот совет на Исламски џихад и Тарек Аз Алдин, кој ги координирал на нападите на милитантите на Западниот Брег.

Според палестинското Министерство за здравство, во ноќните воздушни напади во градот Газа и во Рафах загинале вкупно дванаесет лица, меѓу кои и жени и деца. Околу 20 други се повредени. Покрај командантите на џихадистите, во нападите загинале и нивните сопруги, неколку нивни деца и други луѓе во близина.

Во меѓувреме на цивилното население во јужен Израел му беше укажано да остане во близина на определената безбедна област до среда. Минатата недела, палестинските милитанти во Појасот Газа истрелаа ракети и минофрлачки гранати врз Израел по смртта на Чадер Аднан, висок претставник на Исламскиот џихад. Според израелски извори, неколку лица биле повредени во тие напади.