Израел денеска соопшти дека е убиен новиот шеф на вооруженото крило на Хамас во Газа, Мохамед Одех, во вчерашниот напад во Појасот Газа, само неколку дена откако беше убиен неговиот претходник во сличен напад. 

Израелскиот министер за одбрана Израел Кац изјави дека „командантот на вооруженото крило на терористичката организација Хамас во Газа е елиминиран вчера и е испратен да им се придружи на своите соработници во длабочините на пеколот“.

Хамас сè уште не се огласил. 

„Во име на премиерот и во мое име, им честитам на ИДФ и на Шин Бет за брилијантното извршување na нападот“, напиша Кац во објава на платформата X.

„Ветивме дека ќе ги елиминираме сите оние кои го предводеа масакрот на 7 октомври и ќе го сториме тоа: сите се обележани за смрт, каде и да се“.

По објавувањето на нападот во вторникот, Кац и премиерот Бенјамин Нетанјаху во заедничко соопштение наведоа дека Одејх „беше шеф на разузнавачката служба на Хамас во времето на масакрот на 7 октомври и беше именуван за наследник на Езелдин ал-Хадад пред околу една недела“.

Хадад беше убиен во израелски напад на 15 мај.

„Одех е одговорен за убиствата, киднапирањата и повредите на бројни израелски цивили и војници на ИДФ“, рекоа Кац и Нетанјаху.

Откако Хамас го нападна Израел на 7 октомври 2023 година, Нетанјаху вети дека ќе ги таргетира и елиминира лидерите кои стојат зад него.

Во нападот загинаа 1.221 лице, според бројките на новинската агенција АФП, базирани на официјални израелски податоци.  

Одмаздата на Израел во Газа одзеде најмалку 72.803 животи, според Министерството за здравство на територијата управувана од Хамас. 

Израел претходно ги уби поранешниот политички лидер на Хамас, Исмаил Ханија, и Јахја Синвар, лидер на Газа за кој се верува дека е мозокот зад нападот на 7 октомври.

Исто така, убиен е и Мохамед Деиф, долгогодишен командант на вооруженото крило на Хамас познато како Бригадите Езелдин ал-Касам, како и Мохамед Синвар, кој го наследи својот брат Јахја Синвар како лидер на Газа.

Цел на израелските напади беа и оперативци на Хамас во Либан и високи команданти на Хезболах, кој е сојузник на групата, поддржан од Иран, вклучувајќи го и поранешниот лидер на Хезболах, Хасан Насрала.