Колку ТикТок и помогна на германската екстремно десничарска партија Алтернатива за Германија (АфД) да постигне рекордни резултати на регионалните избори во двете покраини? АфД стана најсилна партија меѓу младите гласачи на возраст меѓу 18 и 24 години со голема разлика во однос на конкурентите, покажува анкетата на Инфратест Димап.

Со оглед на популарноста на ТикТок меѓу младите корисници, ова може да се поврзе со силното присуство на содржината на АфД на платформата, вели Роланд Фервибе, професор на Универзитетот во Потсдам и еден од координаторите на проектот за следење на активноста на германските партии на ТикТок.

„Ние веруваме дека успехот на АфД на ТикТок многу веројатно придонесе за изборниот успех на АфД“, вели Фервибе за ДВ.

„Половина од сите 16-24-годишници ги добиваат своите политички информации само од ТикТок“, додава тој. „Тоа ја прави платформата извонредно влијателна“.

На изборите во неделата во источните германски покраини Саксонија и Тирингија, АфД го забележа најдобриот резултат од која било екстремно десничарска партија од Втората светска војна досега. Самата АфД освои повеќе од двојно повеќе гласови од трите партии во коалициската влада на канцеларот Олаф Шолц заедно - централно-левичарските Социјалдемократи (СПД), екологистите Зелени и неолибералните Слободни демократи (ФДП).

Доминација на АфД во фидовите 

Истражувачите во Потсдам спроведоа анализа на податоците на корисниците, кои сугерираат дека во неделите пред гласањето, содржината поврзана со АфД достигна многу поголема публика на социјалната платформа отколку содржината поврзана со други политички партии. Податоците на следниот графикон тоа јасно го покажуваат: 

За потребите на нивната анализа, тие создадоа 30 фиктивни ТикТок профили на корисници родени во 2006 година кои живеат во Тирингија, Саксонија и Бранденбург, каде што требаше да се одржат регионални избори. 

Тие потоа анализираа повеќе од 75.000 видеа што се појавија во нивните фидови во текот на неделите пред изборите. Во просек, тие откриле дека на корисниците им се прикажувале девет видеа неделно со содржина на АфД - во споредба со нешто повеќе од едно видео неделно поврзано со централно-десничарската Христијанско-демократска унија (ЦДУ) или новоформираната популистичка алијанса Сара Вагенкнехт (БСВ) и значително помалку содржина поврзани со која било друга партија.

Во исто време, истражувачите забележаа дека бројот на видеа што се појавуваат во фидовите на корисниците не е во корелација со вкупната количина на содржина креирана од партиите.

„СПД, на пример, произведе повеќе видеа од АфД во осумте недели пред покраинските избори“, вели  Фервибе, „но видеата на партијата едвај беа пуштени во фидовите на корисниците“.

Една од причините може да биде тоа што мрежа на добро поврзани десничарски инфлуенсери на ТикТок споделуваат содржина на АфД и помагаат во нејзино засилување, другата може да биде дека мнозинството кандидати на АфД, повеќе од која било друга партија, и самите се активни на платформата.  

AfD е поактивна на ТикТок од која било друга политичка партија во германскиот парламент, според студијата од јуни 2024 година на образовниот центар Ана Франк.

Политичките аналитичари ја припишуваат зголемената популарност на АфД меѓу младите гласачи, барем делумно, на нејзиното присуство на социјалните мрежи.

На европските избори во јуни 2024 година, 16% од младите Германци гласаа за АфД, тројно зголемување на уделот на партијата во оваа демографија во споредба со последните избори пред пет години. Овој тренд се одрази на регионалните избори минатиот викенд, вели Фервибе.

Про-АфД содржината што била набљудувана од истражувачите пред покраинските избори во голема мера варира. Од клипови со политички говори до емотивни видеа на теми како што се имиграцијата и навидум неполитичка содржина како што се патувања или видеа за готвење.

„АфД одлично ја совлада забавната природа на ТикТок“, вели Фервибе. „Тие многу добро ја разбраа суштината на ТикТок.