Вевчанци и годинава не поштедија никого на традиционалниот карневал. Од премиерот Димитар Ковачевски, преку кралицата Елизабета, се до претседателот на Европскиот совет Шарл Мишел и фудбалерот Лионел Меси, сите се најдоа на улиците на Вевчани на традиционалниот карневал кој со векови се одржува во селото. Не изостанаа ниту традиционалните зет и невеста, ѓаволи и глупави августи. 

Од настаните во центарот на вниманието беа енергетската и економската криза, војната во Украина, спорот со соседна Бугарија и изградбата на автопатот Кичево–Охрид. 

Иако со скршена нога еден вевчанец продефилира низ поворката маскиран во „полицајка“.

„Јас сум вевчанец и мора да сум василичар, ако сакаш да си вевчанец мора да имаш маска, било каква“, порача тој за МИА. 

По дефилето низ главната улица маскираните го изиграа василичарското оро пред многубројната публика.

За и овој настан да не мине без партиски препукувања се погрижи лидерот на ВМРО – ДПМНЕ Христијан Мицкоски, кој критикуваше дека годинашното издание на карневалот се одржува без поддршка од Министерството за култура. Оттаму го демантираа со став дека организаторите минатата година не аплицирале, а годинава се уште не е донесена одлука на конкурсот кој е во тек. 

Преку маските вевчанци испраќаат пораки годината да биде бериќетна, да има среќа, здравје и да се променат негативните работи во општеството. Се верува дека преку маските Василичарите го бркаат злото и прочистени ќе ја дочекаат Новата година, според Јулијанскиот календар. 

Погледнете како беше во 2019 година од ова видео од нашата архива: