Светскиот совет за климата предупредува на сѐ помал маневарски простор во борбата против Земјиното затоплување. За да се ограничи порастот на температуратана 1,5 степени Целзиусови или максимално 2 степени, уште во текот на оваа деценија мора да се намалат емисиите на штетни гасови во сите сектори, истакнува Климатскиот совет во денеска објавениот синтетизиран извештај.

Генералниот секретар на ОН Антонио Гутереш апелира на зголемување на напорите за заштита на климата, зашто „климатската бомба отчукува.“ 

И претседателот на Светскиот совет за климата, Хоесунг Ли се придружи на апелот, истакнувајќи ја неопходноста за превземање поамбициозни чекори во оваа насока. Темпото и размерите на климатската политика не се доволни за постигнување на целта, истакна Ли, додавајќи: „Ако сега превземеме вистински мерки, можеме да обезбедиме одржлива и достојна иднина за нашето живеење.“Извештајот дава потврда за постоење на технологии за решавање на климатската криза, која во блиска иднина носи растечки опасности за сите региони во светот предизвикани од климатските промени, како поплави и исчезнување на разновидноста на видовите.

Извештајот констатира дека договорот од Климатската конференција во Париз за горна граница од 1,5 степени во затоплувањето на Земјата во однос на прединдустриската ера, е неостварлив со сегашната политика. 

Надминувањето на границата од 1,5 степени би имало неповратни последици во форма на топење на глечерите, раст на нивото на морињата и уништување на еколошките системи.

Светскиот совет за климата со седиште во Женева е водечко светско тело кое се занимава со научни прашања и одговори поврзани со затоплувањето на Земјата. Денеска презентираната синтеза од околу илјада страници се базира на шест извештаи објавени во изминатите години.

Документот се смета за важна дипломатска основа за идните климатски преговори. Во Светскиот совет за климата членуваат 195 држави.