Владата составена од ЦДУ/ЦСУИСПД го надмина најтешкиот внатрешнополитички предизвик: По исцрпувачки дебати, на почетокот на декември во Бундестаготбеше посвоен пакетот реформи за државниот пензиски систем. Клучна одредба: Пензиското ниво останува стабилно до 2031 година.

Основните реформи на системот ќе ги изработи комисија која до средината на 2026 година треба да предложи решенија. Дали ќе се зголеми возраста за пензионирање од 67 на можеби 70 години? Или ќе се напушти концептот на фиксен почеток на пензија за сите, како што предлага економскиот професор Јенс Зидекум?

Зидекум предлага висината на пензијата да зависи од бројот на години поминати во работен однос. Сојузниот канцелар Фридрих Мерц (ЦДУ) ја оцени оваа идеја како „вредна за разгледување“ и додаде: „Сакам да спроведеме реформа која ќе биде целосно усогласена, а оваа тема може да има значајна улога.“

Прашањето за праведно финансиско осигурување на старост во општество каде животниот век се продолжува и бројот на постари лица расте, останува актуелно и во наредната година.

Во буџетот за 2026 година државната инјекција за покривање на дефицитот на пензискиот систем изнесува 128 милијарди евра – околу една четвртина од целокупниот буџет.

Особено младите конзервативни пратеници изразуваат незадоволство од реформата и бараат суштински подобрувања за периодот по 2031 година, особено за идните генерации. Затоа комисијата е под силен притисок да изработи практични предлози за оваа исклучително комплексна проблематика.

Од јануари младите ќе добиваат известувања од Бундесверот

И во однос на воената служба, веќе се донесени значајни одлуки: На почетокот на годината сите лица кои наполниле 18 години ќе добиваат писма од државата. Мажите се должни да го пополнат приложениот прашалник, додека жените можат да го сторат тоа доброволно. Учеството на здравствениот преглед ќе биде задолжително.

Владата очекува доволен број доброволци за да го зголеми бројот на германски војници во наредните десет години од сегашните околу 184.000 на 255.000 до 270.000. Така предвидува планот на сојузниот министер за одбрана Борис Писториус (СПД). Дополнително, се предвидува ангажирање на 200.000 резервисти.

Веќе следната година ќе се покаже дали има доволно доброволци или ќе биде потребно повторно активирање на задолжителната воена служба, која е суспендирана од 2011 година.

Ќе триумфира ли Алтернатива за Германија на покраинските избори?

Во 2025 година Германија беше обележана од прашањето: Колку ќе се засили влијанието на делумно десноекстремната партија Алтернатива за Германија (АфД)?

Во Бундестагот таа веќе е најсилна опозициска партија, а во 2026 година ќе се одржат избори во две источногермански покраини – Саксонија-Анхалт и Мекленбург-Предна Померанија. Според анкетите, АфД моментално има поддршка од 40% во Саксонија-Анхалт и 38% во Мекленбург-Предна Померанија.

Ќе успеат ли демократските партии од центарот да го променат овој тренд? И ако АфД стане убедливо најсилна партија во двете покраини, ќе го одржат ли конзервативците од ЦДУ ветувањето дека нема да соработуваат со неа? Изборите се закажани за септември и ќе ја обликуваат политичката дебата дотогаш.

Почетокот на серијата покраински избори го прават изборите во Баден-Виртемберг и Рајнланд-Пфалц во март.

Миграција: Мерц очекува укинување на граничните контроли

Темата миграција ќе остане приоритетна и во наредната година. Од мај 2025 година, министерот за внатрешни работи Александер Добринт (ЦСУ) нагласува дека Германија води строга политика кон мигрантите. На границите треба да се има повеќе директни враќања на мигранти.

Во декември министрите за внатрешни работи на ЕУ се согласија за значително заострување на заедничката политика за азил.

Се планираат повторно центри за враќање во земји надвор од ЕУ, иако досегашните обиди, како оној на Италија во Албанија, не беа успешни. Лицата кои престојуваат во ЕУ без право на останување и одбиваат да ја напуштат Унијата ќе бидат построго санкционирани.

„Со заедничката политика за азил успеваме да ги префрлиме граничните контроли на надворешните граници на ЕУ“, изјави канцеларот Мерц.

Со други зборови, контролите на германските граници би можеле да се укинат во 2026 година, но дали тоа и навистина ќе се случи останува да се види. За иницијативата на министрите за внатрешни работи на ЕУ согласност треба да даде и Европскиот парламент.

Климатска политика: Ќе се заостри ли спорот во владата?

2026 година ќе биде клучна за националната климатска политика. Во декември ЕУ ги конкретизираше целите: Намалување на емисиите на стакленички гасови за 90% до 2040 година во споредба со 1990 година и климатска неутралност до 2050 година. Министерот за животна средина Карстен Шнајдер (СПД) изјави дека ова е „најзначајната климатска одлука во овој мандат“.

Во март ќе биде претставен нов план за заштита на климата, кој ќе објасни како Германија ќе придонесе за постигнување на целите. До почетокот на 2025 година земјата веќе има намалено 48% од емисиите.

Сепак, министерката за економија Катерина Рајхе (ЦДУ) се потпира на гасни централи и не е амбициозна во поглед на развојот на обновливи извори на енергија.

Експертот за клима од Гринпис, Мартин Кајзер, предупредува дека „драматичните пропусти во транспортниот и станбениот сектор мора да се коригираат со итни и социјално прифатливи мерки. Не смее да се дозволи враќање на фосилните горива во индустриската и енергетската политика.“

Во однос на климатската политика се очекува сериозен спор во владата, како и кај многу други теми. 2026 година ќе биде предизвикувачка за внатрешната политика.