Завојуваните страни во Судан синоќа потпишаа договор со кој се дозволува пристап до хуманитарна помош, а преговорите за постигнување на привремено примирје ќе продолжат, соопштија американски претставници.

Претставници на војската и на паравоените групи, кои се во конфликт речиси еден месец, потпишаа изјава во Џеда, Саудиска Арабија, со која се обврзуваат да ги заштитат цивилите во Судан, изјави американска претставничка која учествуваше во разговорите.

По шестдневни преговори, претставниците на армијата на генералот Абдел Фатах ал-Бурхан и на паравоените Сили за брза поддршка (РСФ) на генералот Мохамед Хамдан Дагло ја потпишаа „Декларацијата од Џеда за заштита на цивилите во Судан“.

Двете страни се обврзаа дека ќе дозволат влез на хуманитарна помош, ќе дозволат обновување на електричната енергија, вода и другите основни услуги, оти ќе ги повлечат безбедносните сили од болниците и ќе обезбедат „достоен погреб“ за загинатите.

Преговорите ќе продолжат за да се постигне ново привремено примирје што ќе овозможи доставување на помош, а на маса е и предлогот за прекин на борбите 10 дена, изјави американската претставничка која не сакаше да биде именувана.

„Не станува збор за прекин на огнот. Станува збор за остварување на обврските според меѓународното хуманитарно право“, особено кога станува збор за цивили, додаде таа.

Вашингтон се надева дека со потпишувањето на овој договор ќе се оздаде „динамика“ која може да доведе до испорака на помош, рече таа, но заклучи дека војската и паравоената група „сè уште не стигнале до таму“.

Судирите во Судан избија на 15 април меѓу суданската војска и паравоените единици предводени од двајца ривалски генерали.

Во насилството досега загинаа повеќе од 600 луѓе, вклучувајќи и цивили, а неколку стотици илјади се раселени или побегнале во соседните земји.