Еден ден откако изјави дека документите што специјалниот руски претставник Кирил Дмитриев ги донесе во Москва од САД се во фаза на оценување, портпаролот на Кремљ, Дмитри Песков, денеска (25.12) изјави дека Русија продолжува да ги разгледува предлозите за завршување на војната.

Песков информираше и дека рускиот претседател Владимир Путин му испратил божиќни честитки на американскиот претседател Доналд Трамп. Сепак, како што додаде, Путин нема да разговара со Трамп телефонски. Во моментов не е закажан таков повик, изјави Песков.

Зеленски ги презентираше 20-те точки од мировниот план на САД за Украина

Вчера, украинскиот претседател Володимир Зеленски за првпат јавно ги презентираше 20-те точки од мировниот план инициран од САД за ставање крај на војната. Според нацртот, предвидени се безбедносни гаранции за Украина по примерот на Член 5 на НАТО - клаузулата за заемна помош - како и армија од 800.000 војници, изјави Зеленски пред новинарите во Киев.

Украинскиот претседател повтори дека се потребни дополнителни појаснувања и разговори. Прашањето за територијалните отстапки кои Русија ги бара за прекинот на огнот останува нејасно, особено во регионот Доњецк, кој е делумно контролиран од Украина. Исто така, мора да се разјасни контролата врз нуклеарната централа Запорожје, која моментално ја држи Русија, рече Зеленски.

Според него, документот содржи украински, руски и американски позиции. Зеленски наведе дека во многу точки имало приближување на позициите, а на некои места дури и консензус.