По изјавите на поддржувачите на Алексеј Навални дека речиси една недела немале никаков контакт со рускиот опозициски политичар, портпаролот на Кремљ, Дмитри Песков, денеска (12.12) изјави дека „секое мешање“ во случајот е неприфатливо:

„Зборуваме за затвореник кој е прогласен за виновен според законот и ја отслужува казната што му е изречена“, изјави Песков, додавајќи: „Секое мешање, вклучително и од САД, е неприфатливо“. Еден ден претходно, САД изразија „длабока загриженост“ за Навални и повикаа на „итно“ ослободување на критичарот на Кремљ.

Навални пропуштил неколку судски состаноци и на адвокатите им било кажано дека е одведен од затворот, велат приврзаниците на рускиот опозициски политичар. Неговата портпаролка Кира Јармиш изјави дека Навални не учествувал и на денешното судско рочиште, со кое требало да биде поврзан преку видео врска. Вработен во казнената колонија ИК-6 рекол дека Навални „ја напуштил колонијата“ и дека никој не знае каде е одведен.

Судот летоска ја зголеми затворската казна на Навални на 19 години и нареди негово префрлање во затвор со построги услови. Трансферите од еден во друг затвор во Русија често траат неколку недели.

Приврзаниците на Навални го поврзаа исчезнувањето на критичарот на Кремљ и неговото евентуално префрлање во затвор со потешки услови со најавата на рускиот претседател Владимир Путин дека ќе се кандидира за нов мандат на претседателските избори идниот март.