Американскиот активист за граѓански права, политичар и пастор Џеси Џексон почина на 84-годишна возраст. Според неговото семејство, Џексон починал „мирно, опкружен со своето семејство“. Во соопштението на семејството се вели: „Неговата непоколеблива верба во правдата, еднаквоста и љубовта инспирираше милиони“.

Семејството ги повика граѓаните да го почитуваат неговото наследство продолжувајќи ја борбата за вредностите што тој ги застапуваше:  правда, еднаквост и достоинство за сите.

Водечки лик на движењето за граѓански права

Џеси Луис Џексон е роден во 1941 година во Гринвил, Јужна Каролина. Во 1960-тите години станал дел од движењето за граѓански права, тесно соработувајќи со Мартин Лутер Кинг во кампањите за  правата на Афроамериканците.  По убиството на Кинг во 1968 година, Џексон се издвои како најпознат афроамерикански активист во  САД.

Во 1971 година ја основал организацијата Rainbow/PUSH во Чикаго, преку која вршел притисок врз корпорациите  да вработуваат повеќе Афроамериканци, користејќи јавни кампањи и бојкоти како средства за промена.

Во 1980‑тите двапати се кандидирал за претседателската номинација на Демократската партија, поставувајќи темели за идните генерации на афроамерикански политички лидери.

Децениски здравствени предизвици – но активизмот не престана

Џексон со години боледувал од невролошко заболување слично на Паркинсон. И покрај здравствените проблеми, останал активен во борбата против дискриминацијата и остро ја поддржуваше современата правна и социјална борба за еднаквост, вклучувајќи го и движењето „Црните животи се важни“ (Black Lives Matter).