Белорускиот властодржец Александар Лукашенко му се закани на Западот со употреба на атомско оружје. Во случај на криза, тој може во секој момент да се јави кај рускиот претседател Владимир Путин, како што изјави денеска за руската телевизија. „Каков проблем би било координирање за еден ваков случај: Тоа не е никаков проблем“, истакна Лукашенко.

Во Белорусија почна стационирањето на руско атомско оружје, кое рускиот претседател Владимир Путин го најави во март, со уверување дека тоа ќе остане под контрола на Кремљ.

Потребата од атомско оружје е условена од нужноста Белорусија да се заштити од напад, Западот со години се обидува да ја растури земјата, тврди Лукашенко, но со атомско оружје во неа, таа сега е сигурна. „Бомбите се гтрипати посилни од оние кои беа користени во Хирошима и Нагасаки. Околу еден милион луѓе би доживеале веднаш смрт. Бог да не` чува од тоа да го искористиме ова оружје“, порача Лукашенко.

Белорусија е најверниот сојузник на Русија и ја стави на користење својата територија за рускиот напад против Украина. По доброволното откажување од нејзиното нуклеарно оружје по распадот на Советскиот Сојуз во 1990-те години, земјата сега првпат добива атомски ракети. Во Белорусија ќе бидат складирани Искандер ракети кои можат да бидат опремени со атомски боеви глави. Повеќе белоруски борбени авиони ќе бидат преадаптирани за користење на новото атомско оружје.