Мадуро: Спречен напад врз амбасадата на САД во Каракас
7 октомври 2025
Среде тензиите меѓу Венецуела и САД, јужноамериканската земја, според сопствени извори, спречила напад врз американската амбасада во главниот град Каракас. Нападот требало да послужи како провокација за да се предизвика ескалација на насилство против Венецуела, изјави претседателот Николас Мадуро, цитиран од новинската агенција АВН. Наводните одговорни лица, според Мадуро, сè уште се во земјата и се трага по нив.
Тензиите меѓу двете земји неодамна се зголемија и поради наводното шверцување дрога во САД. Американската војска, според изјавите на претседателот Доналд Трамп, во изминатите недели неколкупати нападнала бродови во Карибите за кои се претпоставува дека биле натоварени со дрога. Во нападите досега се убиени повеќе од 20 луѓе. Ова дејствување предизвика многу критики, делумно и поради тоа што владата на САД првично не даде информации за тоа врз која правна основа постапува.
„Њујорк Тајмс“: Трамп ги прекинува дипломатските разговори со Каракас
Исто така, Трамп е сè пофрустриран што авторитарниот Мадуро не ги исполнува барањата на САД доброволно да ја предаде власта, пишува „Њујорк Тајмс“. Трамп е вознемирен и поради тоа што венецуелските владини претставници продолжуваат да тврдат дека не се вмешани во трговијата со дрога. Поради тоа, американскиот претседател минатиот четврток наредил да се прекинат дипломатските напори.
Треба да бидат прекинати и директните разговори со специјалниот пратеник на Трамп, Ричард Гренел, и Мадуро, наведува весникот. „Овој чекор го отвора патот за можна воена ескалација против дилерите на дрога или владата на Николас Мадуро“, пишува „Њујорк Тајмс“.
Во меѓувреме, според медиумските извештаи, Мадуро му напишал писмо на Папата Лав XIV со молба да помогне во зачувувањето на мирот во земјата. Повеќе детали за тоа не беа објавени. Мадуро го наследи својот политички ментор Хуго Чавез на власт по неговата смрт во 2013 година. Оттогаш, тој се држи на чело на оваа земја богата со нафта, но заглавена во длабока економска и политичка криза, и покрај обвинувањата за манипулации на неколку избори.