Францускиот претседател Емануел Макрон ја реконструира владата една година по преземањето на функцијата. Важните сектори за економија (Бруно Ле Мер) и надворешна политика (Катрин Колона), како и за одбрана (Себастиен Лекорну) и правда (Ерик Дупон-Морети) не се засегнати, соопшти Елисејската палата во Париз. На функција останува и премиерката Елизабет Борн, за чија смена се шпекулираше со недели.

Ќе бидат сменети министрите за образование и здравство

Со Габриел Атал, Франција го добива најмладиот министер за образование во својата понова историја. 34-годишниот Атал, претходно заменик-министер за буџет, го наследува непартискиот историчар Пап Ндијаје на функцијата. Атал, кој на 29-годишна возраст стана најмладиот член на владата, важи за еден од политичарите во подем во владиниот табор.

Во владината реконструкција што се очекуваше со недели е сменет и министерот за здравство Франсоа Браун и неколку државни секретари. Наследник на Браун ќе биде Орелиен Русо, претходно шеф на кабинетот на премиерката Борн.

Според информациите од владиниот табор, нова во владата е и Оро Берже, досегашна шефица на пратеничката група на владејачката партија Ренесанса. 36-годишната Берже ќе биде нова министерка за солидарност и социјална кохезија.

Државната секретарка Марлен Скиапа, позната по своите отворени изјави и провокативни настапи - на пример на насловната страница на „Плејбој“ - веќе не е дел од новата влада. Таа беше критикувана и поради тоа што фондот за борба против екстремизмот, со кој управуваше таа, попусто трошел јавните средства.

Владата е под притисок

Макрон и владата се ослабени по неколкумесечна борба околувпензиската реформа во земјата, што на крајот беше спроведена. Владата, која нема апсолутно мнозинство во Националното собрание од парламентарните избори пред една година, не можеше да обезбеди сигурно мнозинство за својот клучен проект со гласовите на опозицијата. Под притисок ја ставија и масовните протести на населението против реформата. Дополнителени тешкотии владата имаше и по смртта на едно момче за време на полициска контрола, по што избија немири.