57-годишниот Руте ќе го наследи Норвежанецот Јенс Столтенберг на 1 октомври, објави Алијансата во средата по состанокот на Северноатлантскиот совет во Брисел. Столтенберг по десет години се повлекува од функцијата генерален секретар на НАТО.

На онлајн сервисот X,  Столтенберг напиша  дека тој го дава НАТО во добри раце, за Руте смета дека е „вистински трансатлантичар, силен лидер и медијатор за постигнување консензус“. Претседателката на Комисијата на ЕУ, Урсула фон дер Лајен, на X објави дека тесно ќе соработува со Руте „за дополнително зајакнување на партнерството ЕУ-НАТО“. Минатата недела  романскиот претседател Клаус Јоханис му го расчисти патот  за Руте да стигне на чело на НАТО со повлекувањето на неговата противкандидатура. Холанѓанецот ја презема функцијата во тешка фаза од руската агресорска војна против Украина. НАТО се подготвува и за можен реизбор на поранешниот американски претседател Доналд Трамп и послаба  улога на САД во трансатлантскиот сојуз.