Владините коалициони партнери по несогласувањата околу државните обележја, повторно се во клинч - но овојпат поради вработувањата во администрацијата. Иницијалната каписла за судирот е изјавата на вицепремиерот и министер за животна средина Изет Меџити, од коалициониот партнер „Вреди“, кој на партиски настан на Демократското движење во Шуто Оризари ветил дека за една година Владата ќе реализира повеќе вработувања на Албанци во администрацијата отколку што се направени во двата претходни мандати. 

„За прашањето на вработувањата, за една година ќе направиме онолку вработувања колку што тие направија за два мандати, осум години во Владата. Значи, ќе бидат стотици, ако не и 2-3 илјади Албанци во државната и јавната администрација и насекаде каде што има потреба од обновување на тие работни места, со што ќе се елиминира една пречка и проблем на нашите граѓани, за да не заминуваат во странство и да не ја гледаат својата перспектива надвор од државата“, рекол Меџити. 

Но, ваквата изјава предизвика жестока реакција на министерот за јавна администрација Горан Минчев од редовите на „Знам“. Тој му порача на Меџити да не се однесува како „Алиса во земјата на чудата“, бидејќи вработувањата во јавниот сектор се одвиваат според потребите и врз основа на квалитет.

„Алиса во земјата на чудата“

„Изјавата на вицепремиерот Меџити на партиски настан за масовни вработувања во јавната администрација во период од една година е класичен пример на предизборен популизам, без никаква правна или институционална основа“, оценува Минчев. Тој го повикува Меџити да не ветува нешто што ниту е реално, ниту е возможно без кршење на законските процедури и принципите на доброто управување.

„Јасно и недвосмислено потенцирам дека сите вработувања во јавниот сектор во моментов се одвиваат исклучиво според потребите на институциите, врз основа на претходно добиени согласности од релевантните институции и во согласност со Законот за вработени во јавниот сектор и Законот за административни службеници.Секое вработување се заснова на принципите на компетентност, стручност и професионална подготвеност на кандидатите, а не на партиски ветувања или политички притисоци“, дециден е Минчев. 

Вработувањата во јавната администрација е жежок камен околу кој долго време се кршат копјата во Северна Македонија. И покрај бројните најави за реформи и коренити промени, партиите се пожестокот се обвинуваат за обиди за масовно вработување по роднинска или партиска линија.

Минчев вели дека нема да отстапат од почитувањето на мерит системот, што значи дека вработувањата и унапредувањата во јавниот сектор мора да се темелат исклучиво на квалитетот и способностите на кандидатите, а не на нивната етничка или политичка припадност.

„Политиката на популистички вработувања не само што би го нарушила интегритетот на администрацијата, туку и би ги загрозила реформите кои имаат за цел создавање ефикасна, професионална и деполитизирана јавна администрација.Јавниот сектор не е предизборен пазар каде што се раздаваат работни места во замена за политичка поддршка“, вели тој.

Стравувања од масовна партизација пред избори

Опозициската СДСМ стравува од масовна партизација на јавната администрација. Душанка Георигиева-Трпевски, членка на Извршниот одбор на СДСМ, на прес-конференција ги изнесе сомнежите дека „Вреди“ во договор со премиерот Христијан Мицкоски, се подготвува да спроведе масовна партизација на државната администрација.

„Пред изборите ветија мерит систем, професионализација и праведна држава, а сега веќе е нова песна“, вели таа и прашува дали веќе постои подготвен план за масовна партизација на институциите пред изборите и дали јавната администрација повторно ќе се претвори во партиски штаб наместо во сервис за граѓаните?. Од СДСМ порачаа дека Македонија не смее повторно да стане заробена држава и дека, наместо партизација, на државата ѝ се потребни реформи, економски развој и вистинска шанса за младите.

Реагираа и од Левица. Пратеничката Јована Мојсоска вели дека Владата место за граѓаните, носи работни места само за блиските роднини на функционерите.