Првата дама на САД, Меланија Трамп, ги отфрли сите врски со осудениот сексуален престапник Џефри Епстин. „Лагите што ме поврзуваат со срамниот Џефри Епстин мора денес да престанат“, изјави таа во четвртокот (9.04) во едно од ретките обраќања од Белата куќа. „Никогаш не сум била пријателка со Епстин. Доналд и јас повремено бевме поканувани на исти забави како Епстин, затоа што во Њујорк општествените кругови се преклопуваат“, објасни таа.

Меланија Трамп додаде дека никогаш немала никаква врска со Епстин или неговата соработничка Гислејн Максвел. Сепак, објавените судски документи содржат имејл од 2002 година, во кој Меланија Трамп ѝ пишува на Максвел: „Изгледаш одлично“. Првата дама го повика Конгресот да овозможи јавни сослушувања за жртвите на Епстин.

Аферата Епстин останува политички чувствителна за претседателот Трамп, бидејќи со години бил пријател со финансиерот кој почина во притвор во 2019 година. Неодамна објавени документи на ФБИ покажуваат дека Трамп уште во 2006 година наводно знаел за злосторствата на Епстин – што е во спротивност со неговите тврдење дека не знаел ништо. Документите исто така покажуваат дека Трамп во 1990-тите неколку пати летал со авионот на Епстин, што тој го негира. И министерот за трговија на САД, Хауард Лутник, е под притисок, откако документи покажаа дека во 2012 година бил на приватниот остров на Епстин. Доналд Трамп, додека не беше на претседателската функција, ширеше теории на заговор за Епстин, а сега милионите објавени документи стануваат траен политички товар за неговата администрација.