Бесплатни менструални производи во тоалетите се реткост во Македонија. Младинскиот културен центар е првата културна установа која ќе го скрши мразот.

Јана Коцевска, извршна директорка на непрофитната организација Тииит!Инк, објаснува:

„Самата положба на центарот е на место каде што нема многу продавници и потребно е тука да ставиме диспанзери за менструални производи. Девојките кои се на некој концерт или филмска проекција, кога имаат потреба од менструални производи, ќе можат да ги земат во тоалетите на МКЦ.“

Последните истражувања на истражувачката организација Реактор покажуваат дека една од пет жени барем еднаш во животот немала пристап до менструални производи.

Освен намалувањето на даноците од 18 на 5 отсто за менструални производи, институциите не покажаа интерес за друг чекор:

Теодора Милеска од неформалната иницијатива „Период“ Скопје вели:

„Пристапот до бесплатни и достапни менструални производи е голем чекор во борбата против менструалната сиромаштија. Сиромаштијата никогаш не е индивидуален проблем, туку ни треба структурно решение кое ќе ги опфати сите овие работи: пристап до бесплатни менструални производи, едукација и родова сензитивна инфраструктура со соодветни тоалети за одржување на менструалната хигиена.“

Поставувањето на диспанзерите во МКЦ е направено во рамките на проектот „Нашите тела не се табу“, а организирано по повод 28 мај, Меѓународниот ден на менструална хигиена.