Состојбите во правосудството се економски и безбедносен проблем, оцени премиерот Христијан Мицкоски по средбата со претседателката на Судскиот совет Весна Дамева во вторникот, и рече дека останува на ставот дека и Судскиот совет и Советот на јавни обвинители треба да се распуштат. 

„Нормално, ние си стоиме на ставот за распуштање на тие институции, за кои зборуваме целиот овој период, не очекуваме брзи резултати, но очекуваме напредок“, рече Мицкоски.

Повикувајќи се „на граѓаните“, како и на партиската програма на неговата ВМРО-ДПМНЕ, Мицкоски рече дека се потребни „коренити промени во судството“.

„Ако немате правна држава, ако немате владеење на правото, ако немате обвинители и судии кои што обвинуваат по закон и Устав, тогаш ќе немате ниту економска безбедност, а кога ќе немате економска безбедност ќе немате ниту економска активност, ќе нема буџетот приходи онолку колку што се потребни за да имаме развој, а ако немате развој ќе немате среќни граѓани, среќни компании и нормално е да тие се разочараат и така разочарани да ја напуштаат Македонија. Тоа е суштината на целиот овој систем“, рече Мицкоски на прес-конференција по состанокот со Дамева во Владата. 

Безбедносен проблем  

Дамева на средбата, информираше Мицкоски, не му презентирала конкретни предлози за реформирање на оваа институција, која е независна од владата, туку му раскажала што опфаќаат предлозите. 

Премиерот оценува дека актуелната состојба во правосудството предизвикува и безбедносен проблем.

„Ако немате владеење на право, ако немате правна држава, ако имате високо ниво на криминал и корупција тоа е безбедносен проблем. (...) За нас невладеењето на правото, криминалот, корупцијата, елитите се безбедносен проблем за нашата држава и ние како Влада мораме да реагираме“, порача Мицкоски. 

Дамева по средбата рече дека нејзината институција може да се реформира преку имплементација на препораките од Извештајот на Оценската мисија. Граѓаните заслужуваат, а ние сме доследни да обезбедиме неселективна правда во државата, рече Дамева, додавајќи дека „граѓаните заслужуваат да имаат правда“. 

Намерата на владата да ги распушти двете правосудни тела предизвикува бранување уште од почетокот на мандатот. ЕУ и САД му даваат поддршка на Судскиот совет, бараат тој да се реформира согласно предлозите на европските експерти, и сметаат дека владата на овој начин се меша во независноста на судството.