Најмалку 32 лица загинаа во самоубиствен бомбашки напад и напад на вооружени лица на популарна плажа во сомалискиот главен град Могадишу, соопшти полицијата. 63 лица се повредени, од кои некои потешко, изјави денеска (3.08) портпаролот на полицијата Абдифатах Адан Хасан. Според полициските наводи, бомбаш самоубиец прво се разнел вчеравечер пред вооружени лица да упаднат на плажата Лидо. Сите пет напаѓачи, како што се вели, се убиени. Според полицијата, тие припаѓале на исламистичката милиција Ал-Шабаб, која има извршено бројни бомбашки напади во Сомалија.

Очевидци велат дека во моментот на експлозијата имало многу луѓе на плажата Лидо. Во областа околу плажата има луксузни хотели и ресторани и тоа место е популарно меѓу деловните луѓе и владините службеници.

Милицијата Ал-Шабаб, која е поврзана со терористичката мрежа Ал Каеда, од 2007 година се бори против сомалиската влада, која е поддржана од меѓународната заедница. Откако во текот на изминатите години беше потисната, терористичката милиција сега се обидува да го врати теренот во Могадишу. Постојано има напади врз владини институции и врз хотели или ресторани каде, од гледна точка на исламистите, владее западен начин на живот. Во јули, единаесет лица загинаа во терористички напад на кафеана за време на финалето на Европското фудбалско првенство.