НАТО смета дека воените маневри на Русија и Белорусија кои се во тек не претставуваат „непосредна воена закана“ за сојузниците на Алијансата. Сепак, воениот сојуз ги следи руските воени активности „многу внимателно“, изјави денеска (12.09) за агенцијата АФП неименувана претставничка на НАТО. Кремљ постојано покажува „недостаток на транспарентност“ во однос на големината и обемот на своите маневри, додаде таа.

Русија и Белорусија ја започнаа својата голема воена вежба „Запад 2025“ на источното крило на НАТО изутринава. Според белоруски извори, поголемиот дел од вежбите ќе се одржат до вторник источно од белоруската престолнина Минск - околу 100 километри од границата со Литванија, членка на ЕУ и НАТО.

Маневрите, кои започнаа два дена откако бројни руски беспилотни летала влегоа во полскиот воздушен простор, предизвикаа голема загриженост, особено кај источните земји-членки на НАТО.

„Ги повикуваме Русија и Белорусија да дејствуваат предвидливо и транспарентно во согласност со нивните меѓународни обврски“, изјави претставничката на НАТО, додавајќи дека е познато оти Русија ги користи воените вежби како политичка закана.