Генералниот секретар на НАТО, Марк Руте во понеделникот потврди дека севернокорејските трупи кои беа испратени во Русија се стационирани во регионот на Курск.

„Продлабочената воена соработка меѓу Русија и Северна Кореја е закана за Индо-Пацифичката и за Евро-Атлантската безбедност“, изјави Руте откако претставници на НАТО добија брифинг од делегација од Јужна Кореја. 

Украинските трупи упаднаа во регионот Курск во август годинава, и се уште ја држат под контрола таа територија. 

Oпасно проширување“ на војната 

Руте оцени дека распоредувањето на војници од Северна Кореја претставува „значителна ескалација“ на инволвираноста на Пјонгјанг во „илегалната руска војна“ во Украина, прекршувањето на резолуциите на ОН и „опасно проширување“ на војната. Генералниот секретар на НАТО смета дека распоредувањето на севернокорејски трупи е сигнал за „растечкиот очај“ на рускиот претседател Владимир Путин. 

„Над 600.000 руски војници загинаа или се ранети во путиновата војна и тој не е во состојба да ја одржи агресијата врз Украина без странска поддршка“, изјави Руте.

Кремљ ги отфрли извештаите за севернокорејските трупи како „лажни вести“. Но, Путин во четвртокот не негираше дека севернокорејски трупи се во Русија и дека е работа на Москва како ќе го имплементира партнерството со Пјонгјанг. 

Претставник на Северна Кореја во ОН ги нарече извештаите „неосновани гласини“.