Поради учеството на Израел на следното издание на Изборот на песна на Евровизија (ЕСЦ), швајцарската музичка ѕвезда и минатогодишен победник, Немо, го враќа трофејот што го освои во 2024 година. „Веќе не чувствувам дека овој трофеј припаѓа на мојата полица“, напиша Немо на Инстаграм. Тој најави дека ќе го врати пехарот во Европската радиодифузна унија (EБУ) во Женева. „Ако вредностите што ги славиме на сцената не се живеат и надвор од сцената, дури и најубавите песни стануваат бесмислени“, објасни Немо.

Немо: Конфликт помеѓу вредноста и одлуката

Станува збор за „фактот дека натпреварот постојано се користи за подобрување на имиџот на држава која е обвинета за тешки злосторства“, напиша Немо. Тој истакна дека истражната комисија на Советот на ОН за човекови права заклучила дека израелските власти и безбедносните сили извршиле геноцид во војната во Појасот Газа. Израел категорично ги отфрла обвинувањата на ова тело на ОН.

Немо напиша дека според организаторите на EСЦ, настанот претставува единство, инклузивност и достоинство, но дека учеството на Израел укажува на конфликт помеѓу тие вредности и одлуките на EБУ.

Повеќе земји го бојкотираат EСЦ

Членовите на EБУ минатата недела дадоа зелено светло за учеството на Израел. Како објаснување, беше наведено дека најголемиот музички спектакл во светот е настан на јавните радиодифузери и дека не треба да има врска со политиката. Како одговор, радиодифузерите од Шпанија, Холандија, Ирска, Словенија и Исланд најавија дека ќе го бојкотираат ЕСЦ 2026 во Виена.

Сепак, германскиот АРД ја поддржа одлуката да му се дозволи на Израел да учествува и експлицитно ја поздрави одлуката на EБУ. „Многу ни е мило што на крајот правилата, вредностите и непристрасноста на јавните медиуми беа посилни од емотивните јавни дебати на денешницата“, рече директорката на БР, Катја Вилдермут. Таа е член на Извршниот одбор на Европската радиодифузна унија како претставник на АРД и ЦДФ.