Кога американскиот претседател Доналд Трамп по средбата со израелскиот премиер Бенјамин Нетанјаху се појави пред новинарите во Белата куќа, изгледаше трогнат и импресиониран - од неговата работа за мир на Блискиот Исток и од самиот себе.

Тој зборуваше за голем и прекрасен ден, веројатно еден од најголемите денови во историјата на цивилизацијата. Стануваше збор за работи што се случувале со стотици, па дури и илјадници години, рече Трамп. Но сега, според него, работите се „повеќе од блиску“ до договор за завршување на војната во Појасот Газа.

20 точки за завршување на војната

Основата треба да биде план од 20 точки што Белата куќа неодамна го објави. Клучни точки се: Војната ќе заврши веднаш, ако се согласат двете страни. Сите заложници ќе бидат ослободени во рок од 72 часа по јавната согласност на Израел. За возврат, Израел ќе ослободи неколку стотици палестински затвореници. Израелската армија постепено ќе се повлекува.

Хамас повеќе нема да игра улога во владата на Газа. Оние што ќе го положат оружјето ќе добијат амнестија. Администрацијата привремено ќе ја преземе технократски, неполитички комитет надгледуван од ново меѓународно тело.

„Шанса за Палестинците“

Трамп јасно стави до знаење дека знае оти спроведувањето на сето ова е полно со стапици. Создавањето мир, рече тој, не е лесно. На крајот на краиштата, на Блискиот Исток на решавање чекаат „некои од најтешките проблеми во светот“.

Од перспектива на американскиот претседател, Палестинците сега се соочуваат со избор. Тие можат да ги искористат шансите што ги нуди планот - или да не ги искористат. Трамп рече дека ги предизвикува Палестинците да ја преземат одговорноста за сопствената судбина.

Нетанјаху се согласува – и му се заканува на Хамас

Израелскиот премиер Нетанјаху потоа изјави дека безрезервно го поддржува планот на Трамп бидејќи ги исполнува воените цели на Израел. „Тој ќе ги врати сите наши заложници, ќе ги уништи воените капацитети на Хамас, ќе го прекине неговото политичко владеење и ќе се погрижи Газа никогаш повеќе да не претставува закана за Израел.“

Во случај Хамас да не го прифати американскиот план или само да се преправа дека го прифаќа, а потоа да го торпедира, Нетанјаху се закани дека ќе ја продолжи воената операција. Тој јасно стави до знаење дека Хамас ќе биде уништен, на еден или друг начин.

„Жалење“ за израелскиот напад врз Катар

Според Белата куќа, за време на состанокот, Трамп и Нетанјаху оствариле заеднички телефонски разговор со премиерот на Катар, Мохамед бин Абдулрахман Ал Тани. За време на разговорот, Нетанјаху го изразил своето „најдлабоко жалење“ за израелскиот напад врз раководството на Хамас во Доха пред неколку недели.

Беше објавено дека Нетанјаху изјавил оти Израел нема повторно да го нападне Катар. Ова не е извинување, но според Белата куќа, Ал Тани го поздравил уверувањето на израелскиот премиер.

Автор: Карстен Кинтоп, АРД