Израелскиот премиер Бенјамин Нетанјаху синоќа во американскиот Конгрес изјави дека победата на Израел ќе биде и американска и повика двете земји да останат обединети по девет месеци војна во Појасот Газа.

„За да триумфираат силите на цивилизацијата, Америка и Израел мора да останат обединети“, рече Нетанјаху во Претставничкиот дом на Конгресот на САД.

„На Блискиот Исток, иранската оска на теророт ги предизвикува САД, Израел и нашите арапски пријатели. Тоа не е конфликт на цивилизации, туку судир на варварство и цивилизација“, додаде Нетанјаху.

Тој апелираше до САД да обезбедат нова воена помош за Израел и зборуваше за демилитаризирана и дерадикализирана Газа по војната и изрази уверување во исходот од преговорите за ослободување на заложниците кои ги држи Хамас.

„Убеден сум дека овие напори ќе бидат крунисани со успех“, рече израелскиот лидер, заблагодарувајќи му се на американскиот претседател Џозеф Бајден за неговите неуморни напори во полза на заложниците.

„Победата на Израел ќе биде и победа на САД“, рече Нетанјаху, додавајќи дека Израел не се штити само себеси.

„Ние ве штитиме вас, нашите непријатели се ваши непријатели, нашата борба е ваша борба и нашата победа ќе биде ваша победа“, рече Нетанјаху.

Посетата на израелскиот лидер на Вашингтон, кој допатува во понеделникот, предизвика дополнителен метеж среде политичките превирања во САД поради повлекувањето на Бајден од претседателската трка.

Многу избрани членови на Демократската партија го критикуваат десничарскиот израелски лидер за начинот на кој ја води војната против Хамас во Појасот Газа во која загинаа илјадници Палестинци и предизвика хуманитарна катастрофа.

Илјадници демонстранти се собраа околу Конгресот да протестираа против говорот на Нетанјаху и бараа прекин на огнот во Газа.

Демонстрантите носеа транспаренти повикувајќи на прекин на американската помош за Израел и нарекувајќи го Нетанјаху воен злосторник.

Нетанјаху му се обрати на Конгресот за да ја одбрани својата цел да го елиминира Хамас и да ја нагласи заканата од Иран.

За американскиот претседател, меѓутоа, приоритет е да го притисне Нетанјаху да постигне договор за прекин на огнот со Хамас во време кога некои се сомневаат дека тој потклекнува под притисокот на екстремната десница во неговата влада.

Подготовката за повоениот период е важна и за Вашингтон, а тука постои јаз меѓу двете влади, особено околу изгледите за создавање на палестинска држава.