Нобеловата награда за мир за 2025 година ја доби венецуелската политичарка Марија Корина Мачадо, објави Нобеловиот комитет во Осло. Таа ја прима наградата за нејзината „неуморна посветеност“ на демократските права на венецуелскиот народ, изјави претседателот на Комитетот, Јорген Ватне Фриднес.

„Како лидер на демократското движење во Венецуела, Марија Корина Мачадо е еден од најнеобичните примери на граѓанска храброст во Латинска Америка во последно време“, се вели во соопштението на Комитетот. Минатиот октомври, опозициската политичарка веќе ја доби наградата Сахаров за човекови права од Европскиот парламент.

Минатата година Мачадо беше номинирана за кандидат на опозициската „Платформа за демократско единство“ на претседателските избори во Венецуела, но потоа беше исклучена од изборната трка од страна на провладиниот Национален изборен совет.  Дипломатот Едмундо Гонзалез Урутиа,  кој, според меѓународните набљудувачи, доби најмногу гласови, спротивно на официјалното објавување на изборните резултати, се пријави на нејзино место. Авторитарниот лидер Николас Мадуро  владее со Венецуела од 2013 година и останува и натаму на власт.

Нобеловата награда  за мир е една од најпрестижните награди во светот. Оваа година беа номинирани 338 кандидати - но имињата на номинираните официјално се чуваат во тајност 50 години. Сепак, имињата продолжуваат да протекуваат. Рокот за номинирање истече на крајот на јануари оваа година.

Нобеловата награда за мир за 2024 година  беше доделена на јапонската мировна организација Нихон Хиданкио. Организацијата беше одликувана за нејзината посветеност на свет без нуклеарно оружје.