„Светот се наоѓа на крстопат“, изјави генералниот секретар на Обединетите нации, Антонио Гутереш, и апелираше до светските лидери: „Изберете ги луѓето и планетата наместо страдањето“. Според податоците, повеќе од една четвртина од човештвото живее во области погодени од конфликти. „Опкружени сме со хаос и несигурност. Поделби, насилство, климатски колапс и систематски кршења на меѓународното право.“ Гутереш нагласи дека во 2026 година, лидерите мора да работат на ублажување на човечкото страдање и борбата против климатските промени.

Нееднаквоста помеѓу воените трошоци и хуманитарната помош

На повеќе од 200 милиони луѓе низ целиот свет им е потребна хуманитарна помош, додека воените трошоци се зголемија на 2,7 билиони долари - што е 13 пати повеќе од износот за помош за развој, рече Гутереш. Таа сума одговара на бруто домашниот производ на африканскиот континент, и ако трендот продолжи, до 2035 година воените трошоци би можеле да достигнат 6,6 билиони долари. 

Неодамна, САД објавија дека ја намалуваат помошта за Обединетите нации од 17 милијарди долари на 2 милијарди долари. УНИЦЕФ во својот годишен извештај наведе дека никогаш порано повеќе деца не живееле во воени и кризни подрачја. На почетокот на декември, Стокхолмскиот институт за истражување на мирот (СИПРИ) пријави рекордни приходи од продажба на оружје.

„Јасно е дека светот има ресурси за подобрување на животите, да се излечи планетата и да обезбеди иднина со мир и правда“, заклучи Гутереш. Неговиот втор мандат истекува на крајот на 2026 година, а во новата година тој повика на вистинските приоритети: „Безбеден свет започнува со тоа да инвестираме повеќе во борбата против сиромаштијата, а помалку во војните. Мирот мора да победи.“