Судски процес за трагедијата во Кочани

Започна судскиот процес за пожарот во дискотеката „Пулс“ во Кочани, кој однесе 63 животи и повреди над 200 лица. Овој настан ја потресе целата држава и отвори сериозни прашања за безбедноста, одговорноста и корупцијата во институциите.

Судењето се одржува во големата дигитализирана судница при КПУ „Идризово“ во Скопје. Со полициски комбиња беа донесени неколкумина од обвинетите кои се во притвор. Пред судницата имаше засилено обезбедување. Процесот предизвика голем интерес кај медиумите во Македонија. 

„Ќе дојдеме до правдата“

Судијката Диана Груевска-Илиевска, која претседава со судечкиот совет, порача дека процесот ќе биде транспарентен и професионален:„Ќе дојдеме до правдата. Ќе имаме респект кон тагата и болката на роднините на жртвите, но апелирам на трпение и дисциплина“, изјави таа.

Судот не може да гарантира колку брзо ќе тече процесот. „Колку ќе трае процесот никој не знае“, рече Груевска-Илиевска.

 

Обвинети и обвиненија

За трагедијата се обвинети 38 лица – 35 физички и три правни лица. Меѓу нив има поранешни министри, ексградоначалници, инспектори и сопственици на фирми. Првообвинет е сопственикот на „Пулс“, Дејан Јовановски, кој заедно со неговиот брат е во притвор. Сите се товарат за „тешки дела против општата сигурност“, а едно лице за примање мито.

Трагедијата се случи на 16 март годинава. Според истрагата, пожарот избил во ноќните часови за време на забава во дискотеката „Пулс“. Многу од присутните не успеале да излезат навреме поради блокирани излези и недостиг на противпожарна опрема.

Спојување на обвиненијата

Судот одлучи да го спои обвинението против сопственикот на агенцијата за обезбедување „Рубикон“, Александар Нацев, со главниот предмет. Со ова, Нацев стана 35-ти обвинет физичко лице во постапката. Причината за спојувањето е економичност на судската постапка.

 

Граѓански реакции и барање за правда

Пред судницата, граѓанското движење „Кој е следен“ постави транспарент со порака „Ве гледаме!“, барајќи непристрасен и транспарентен процес, ослободен од политички влијанија. Оваа герила акција ја симболизира недовербата на јавноста кон институциите и силната желба за правда.

Што следува понатаму?

Судењето ќе трае долго, предупреди судијката, бидејќи станува збор за комплексен случај со многу обвинети и докази. Семејствата на жртвите бараат брза и правична пресуда, додека јавноста внимателно го следи процесот.