Пред пленарната сесија на КОП28, Светската конференција за климата во Дубаи, германскиот канцелар Олаф Шолц повика на глобално постепено укинување на јагленот, нафтата и гасот. „Сега сите мораме да покажеме цврста решеност за излез од фосилните горива - пред сè јагленот. На оваа климатска конференција треба да се обврземе". Шолц истакна дека сè уште е можно емисиите на стакленички гасови,  штетни за климата, да се намалат оваа деценија до таков степен што ќе биде исполнета целта од 1,5 степени договорена во Париз во 2015 година. „Науката многу јасно ни порачува: мораме да побрзаме - и покрај сите геополитички тензии“, рече тој, мислејќи на војните во Појасот Газа и Украина, кои се исто така голема тема на конференцијата за климата.

Климатска неутралност до 2045 година

Климатските промени остануваат „големиот, глобален предизвик на нашето време“, нагласи Шолц. Но, веќе постојат сите потребни средства за да се одговори на овој предизвик. „Технологиите се тука:  енергија од ветер, фотоволтаици, електрични погони, зелен водород. Германија го поттикнува развојот на овој план. „Како успешна индустриска земја, сакаме да живееме и работиме на климатски неутрален начин до 2045 година“, рече тој.

Канцеларот апелираше до близу 200 земји присутни на Конференцијата на ОН за климата: 

„Да го направиме проширувањето на обновливите извори на енергија приоритет број еден во енергетската политика - ширум светот!" Тој конкретно предложи договор за две обврзувачки цели кои се веќе договорени во индустриските земји од Г20: од една страна, тројно зголемување на проширувањето на обновливите извори на енергија и, од друга страна, удвојување на енергетската ефикасност - и двете до 2030 година.

Експертите за клима не се понесени од говорот на Шолц

Досега, повеќе од 110 земји се согласија да го прошират производството на зелена електрична енергија со ова темпо. Според дипломатите, на  Светската конференција за климата,  која ќе трае до 12 декември, до крај ќе се води борба за тоа колку ќе бидат обврзувачки определбите. Климатскиот експерт од развојната организација Оксфам, Јан Ковалциг, говорот на канцеларот го смета за „реторички беспрекорен, но „понесувачко воодушевување изгледа поинаку“. Ова не е начин да се инспирира конференција за климата. И, за жал, политиката на германската влада не одговара на бараното  исфрлање на фосилните горива:  владата на Шолц  работи против Парискиот договор со изградба на нова инфраструктура за фосилни горива за увоз на течен гас и, во исто време, го поткопува Закон за заштита на климата. „Канцеларот мудро го премолчи тоа," констатира експертот Јан Ковалциг.

Апел до Заливските држави и Азија

Шолц го коментираше и финансирањето на штетата што веќе е предизвикана од климатските промени. Германија сега троши околу десет милијарди евра годишно за меѓународна климатска политика, а исто така придонесува со 100 милиони евра во новооснованиот фонд за катастрофи, рече канцеларот. Овој фонд е наменет за помош на посиромашните земји во подобро справување со штетите што веќе настанале поради климатските промени, како што се суши или поплави. Шолц очигледно апелираше до земјите од Заливот и Кина да учествуваат во него. „Одговорност сносат и земјите чиј просперитет енормно порасна во последните три децении и кои сега учествуваат со голем дел од глобалните емисии“, рече тој, без да ги именува земјите.

На пладне, Шолц патува назад во Германија, порано од првично планираното. Причина за тоа се претстојните преговори со коалициските партнери ФДП и Зелените за  буџетската дупка.

Повик за проширување на нуклеарната енергија

На конференцијата за климата група од околу 20 земји повика на проширување на капацитетите за нуклеарната енергија. САД, Франција, Велика Британија и земјата домаќин, Обединетите Арапски Емирати, се меѓу оние кои се вклучени во заедничката декларација. Целта е да се намали зависноста од фосилни горива, како што беше речено. Групата држави побара инсталираната моќност на нуклеарните централи ширум светот да се зголеми трипати до 2050 година во споредба со нивото во 2020 година. Декларацијата ја дистрибуираше американскиот претставник за климата Џон Кери. Меѓу потписниците се и Белгија, Финска, Јапонија, Полска, Шведска и Украина, но не и Русија и Кина, кои исто така имаат голем број нуклеарни централи. Кери се осврна на научните изјави дека климатската неутралност до 2050 година „не е остварлива“ без нуклеарна енергија.