По бројните недоумици во јавноста, Министерството за финансии информира дека усвоените измени на Законот за ДДВ нема да влијаат на начинот на кој граѓаните ги преземаат своите пратки од странство, вклучително и оние нарачани преку платформата Тему.

ДДВ останува вклучен во цената на производот, што значи дека граѓаните нема да плаќаат ништо дополнително при прием на пратката. Нема нова обврска за уплата, нагласуваат од Министерството.

Како се пресметува ДДВ за онлајн пратки?

ДДВ кој е пресметан во цената кон државата го уплаќа овластениот шпедитер или поштенскиот оператор со кој платформата има договор. Со законските измени не се менува начинот на прием и царинење на пратките во Македонија.

Целта на законските измени

Собранието деновиве ги изгласа измените и дополнувањата на Законот за данок на додадена вредност, со кои се укинува ослободувањето од ДДВ за онлајн пратки со вредност до 22 евра.

Целта е зајакнување на домашната економија, поддршка на локалните компании и создавање нови работни места.

Ефектите врз домашната економија и компаниите

Спроведувањето на измените се очекува да има директни позитивни ефекти врз економијата и работењето на домашните компании. Со укинувањето на ослободувањето, околу 4 милиони денари месечно – колку што изнесува прометот кон странските онлајн платформи во одредени периоди – ќе се пренасочат кон домашното стопанство.

Овие средства се очекува да помогнат во растот на локалните компании, креирањето нови работни места и подобрувањето на условите и платите на вработените.

Намалување на сивата економија

Досегашниот систем дозволуваше злоупотреби – увоз на стоки ослободени од ДДВ кои понатаму се продаваа на домашниот пазар. Новите законски решенија ја спречуваат оваа пракса и обезбедуваат фер и контролирана пазарна средина, велат од МФ

Трошокот за пресметката и плаќањето на ДДВ нема да падне на товар на граѓаните, што значи дека нема да има промена на цените за крајните потрошувачи. Мерката, според надлежните, обезбедува фер конкурентност помеѓу домашните и странските онлајн продавници.