Санкциите на ЕУ против Русија истекуваат на крајот на јануари, а унгарскиот премиер Виктор Орбан одбива да се согласи со нивно продолжување. Како што дознава германската агенција ДПА од неколку учесници на самитот на ЕУ во Брисел, Орбан им рекол на другите шефови на држави или влади дека мора да размисли за ова прашање. Тој сака да донесе одлука дури по инаугурацијата на новоизбраниот американски претседател Доналд Трамп на 20 јануари.

Трамп неколкупати изјави дека за кратко време може да стави крај на руската војна против Украина. Од гледна точка на Орбан, основата за санкциите тогаш би отпаднала. Тој постојано ги критикуваше санкциите како бескорисни и лоши за европската економија. Доколку Унгарија не се согласи да ги продолжи санкциите на ЕУ, тие ќе истечат на 31 јануари. Тоа би влијаело на опсежните економски и финансиски санкции, но и на посимболичните санкции против повеќе од 2.000 луѓе и компании. Меѓу нив се и врвни руски политичари, како претседателот Владимир Путин и бројни олигарси.

Во меѓувреме, дипломатите нагласија дека и по 20 јануари ќе има доволно време за навремено продолжување на санкциите. Се претпоставува дека Орбан можеби ќе сака да изнуди отстапки од своите партнери во ЕУ и во други области. Поради дефицитот на владеењето на правото во Унгарија, во моментов се замрзнати милијарди евра од фондовите на ЕУ наменети за земјата.

Формалната одлука за продолжување на санкциите на ЕУ мора да биде донесена едногласно од страна на Советот на Европската унија. Досега самитот на ЕУ вообичаено даваше налог за тоа. Сегашните правила предвидуваат санкциите да се продолжуваат на секои шест месеци.